Topographia Sueviae: Weissenhorn
An dem Wasser Rott / zwo Meilen von Vlm gelegen / vnd Herrn Graf Friderich Fuggern der Zeit gehörig. Pirckheimerus vnd Bertius, halten es für der alten Viana. Hat ein doppelt Schloß / darbey die Kirch ist. [216] Ein kleiner Orth / der aber / sonderlich gegen Babenhausenwärts / zimliche Vorstätt hat. Gehörte vor Zeiten zur Grafschafft Maurstätten / oder Morstätten / so hernach / durch Heurath / an die Herrn von Neiffen gelanget ist. Hat etwan von den Käysern Confirmation jhrer Regalien / vnd Privilegien / erlanget. Käyser Maximilianus I. hat dieses Stättlein / vnd die Graffschafft Kirchberg / so Anno 1504. im Bäyrischen Kireg / Jure Fiscali an jhn kommen / noch bey Lebzeiten deß letzten Graffen von Kirchberg Philippi / (der keine Kinder gehabt / vnnd daher ein gewisses Gelt / zu seiner Vnterhaltung / so lang er gelebt / genommen / vnd welcher hernach Anno 1510. gestorben.) Anno 1507. Herrn Vlrichen / Georgen / Jacoben / (der das Schloß allhie von newem hat erbawen lassen) den Fuggern / vmb siebentzig tausendt Gülden / auff zehen Jahr lang versetzt; vnnd seyn hernach / als noch mehr Gelt darzu kommen / endlich diese Pfandt / an deß besagten Georgii Söhne / Raimundum vnd Antonium, gelangt / denen zugleich mit dem Wappen / vnd Titul der Freyherrn / vnd dem Privilegio Gold vnnd Silber zu müntzen / den 14. Decembris Anno 1530. auff dem Reichstag zu Augspurg / solche bestättiget worden. Crusius in Annalib. Suevicis. Chronicon Famil. Fugger. Manuscr. & Wolffgang. Dieterich Caesar in der Augspurg. Chronick part. 2. c. 12. fol. 264. Gehört jetzo Herren Carl Philippen / vnnd Albrecht / Fuggern / Gebrüdern. Es hat solcher Ort / im nächsten Krieg / allerhand Gäste gehabt; vnd lag Anno 1646. der Frantzösisch Gen. Touraine, allhie. Herr Graf Friederich Fugger / etc. so vorhin allda residirt gehabt / hat in der Anno 1649. mit hochwolgedachten dero Herren Bruders Söhnen / gemachten Abtheilung / Brandenburg / vnd Dietenheim / beyde bey der Isar gelegen / bekommen.
