Topographia Sueviae: Mindelheim
Ligt im Algöw / in der Ebne / vnd am Fluß Mündel; das Schloß aber in der Höhe / ausserhalb der Statt / auff S. Georgen-Berg / so aber nicht zur Defension gerichtet ist. Es hat viel Holtz herumb / vnd gehören viel Dörffer zu solcher Herrschafft. Vnnd werden von hinnen drey Meilen auff Memmingen / sechs / oder sieben gen Augspurg / vnnd auch sieben nach Vlm / durch Babenhausen / vnnd Weissenhorn / gerechnet. Hertzog Vlrich von Teck hat Anno 1409. die PfarrKirch allhie gebawet. Es hat sonsten der Zeit ein feines Frawen-Kloster / vnnd ein Jesuiter Collegium allda. Vnnd ist die Statt von aussen her / von steinern Häusern wol versehen. Es hat diese Herrschafft vor Zeiten denen von Hohenschlitz gehört / denen es die Hertzogen von Teck mit Gewalt entzogen; Derwegen mit der Zeit Walther von Hohenschlitz / Bischoff zu Augspurg / diese Statt An. 1369 belägert hat / aber darvor geschossen worden, vnd todt [132] blieben ist. Vnnd solle auch vorhero vmbs Jahr 1324. Schloß vnnd Statt allhie mit Fewer vnd Raub zu nichte gemacht worden seyn. Bey gemelten Hertzogen von Teck / ist hernach Mindelheim / biß auffs Jar 1439. geblieben / da der letzte Hertzog von Teck Ludovicus gestorben; dessen Schwestern eine Graff Hansen von Wertheim / vnd die andere Veiten von Rechberg geheuratet / vnnd dieser Orth / durch Erbschafft vnnd Kauff / Anno 1444. an Bernharden von Rechberg kommen ist / dessen Tochter Barbara / Herrn Vlrichen von Freundsperg zur Ehe genommen; welcher Vlrich / sampt seinem Bruder Hansen / diese Herrschafft Mündelheim / von jhrem Schwager Anno 1467. erkaufft haben. Auß welchem Freundspergischen Geschlecht der Letzte / Herr Georg / noch Anno 1585. gelebt / vnd eine Gräfin von Montfort zur Gemahlin gehabt / dessen Schwester Catharina Anno 1582. gestorben / vnd von Herrn Oth Heinrichen Grafen zu Schwartzenberg / ein Töchterlein / Nahmens Maria / verlassen: Die andere Schwester aber / Nahmens Paula / hat Herrn Wilhelm von Kreut auß Böheim geheurathet. Besagte Mariam / Gräfin zu Schwartzenberg / hat hernach H. Christoph Fugger zur Ehe genommen / vnd so wol wegen derselben / als auch einer starcken Summa Gelts / dies Herrschafft Mündelheim besessen / derentwegen aber / zwischen Herrn Oth Heinrichen Grafen zu Schwartzenberg / Herrn Wolff Wilhelm von Mäxelrain / vnd Herrn Hansen Fugger; (so das oberwehnte Gelt hergeschossen) vnd nach deren Absterben / zwischen H. Wolff Veiten von Mäxelrain / vnd gemelten H. Christoph Fuggern / Strittigkeiten sich erhoben / biß daß auff besagtes H. Wolff Veiten von Mäxelrain inständig Anhalten / Hertzog Maximilian auß Bäyern / jetziger Churfürst / sich solcher Freundspergischen Erbschafft endlich anzunehmen bewegt worden: Von welcher Zeit dann auch biß daher solche Herrschafft Bäyerisch ist; wiewol An. 1633. der Schwedische Feldmarschall / H. Gustav Horn solchen Ort mit Accord / vnd da er wider Bäyrisch worden / der Schwedische Obriste Plato Anno 1634. mit Sturm erobert haben.
In der Pfarrkirch allhie / seyn etliche ansehnliche Begräbnussen der Hertzogen von Teck / auch deren von Rechberg / vnd Frundsperg / oder Fronsperg / zu sehen. Das Jesuiter Collegium allhie / ist / vor Zeiten / ein Closter gewesen / welches vmbs Jahr 1260. im Flecken Berdernow / für den Wilhelmiter Orden gestifftet; hernach den Eremitanern S. Augustini, vnd endlich den Jesuitern zu Theil worden ist. Deß Stiffters Svvighardi, oder Schvvigeri, von Mindelberg / (welches Schloß / nicht weit von Mindelheim / jetzt auffm Hauffen ligt / ) Ritters / vnnd seiner Gemahlin Elisabethen Freyin von Aicham / Sohn / Schvviggerus II. von Mindelberg / hat solches Closter hernach in die Statt Mindelheim / Anno 1263. versetzt / der der letzte seines Geschlechts gewesen. Es war / mit der Zeit / dises Closters Prior / vmbs Jahr Anno 1382. P. Georgius, Hertzog Friderichs von Teck Sohn / ein D der Heiligen Schrifft / vnd deß Augustiner Ordens durch Bäyern Provincial / so in der Kirchen allda begraben ligt. Anno 1646. gegen dem Ende deß Octobris / ward die Statt von den Schwedischen vberstiegen / vnd außgeplündert / das Schloß aber mit Accord erobert / vnnd hernach von jhnen / wie man berichtet hat / in Brand gesteckt. Vid. Bruschius de Episcopat. Germaniae cap. 8. Munsterus lib. 5. c. 235. Crusius in Annalibus Suevic. Acta Publica. Pars 2. Theatri Europaei, & Martin. Zeiller / part. 2. seu contin. Itinerar. German. fol. 398. seq.