Topographia Sueviae: Buchorn
Ligt zu nächst vnter Argen am Boden-See / welcher vnterschiedtliche Nahmen hat / vnd Bodamicus, Venetus, Acronius, vnnd Brigantinus genandt / vnnd in den Obern vnd Vntern getheilet wirdt. Er solle in der Länge / fünff / sechs / oder sieben / vnnd in der Breyte / zwo / oder fast drey Teutsche Meilen haben. Sein Wasser ist süß / vnnd schön hell / so nicht gefrieret / aber solches doch Anno 1573. geschehen ist / daß man an statt der Schiff / auch starck beladene Wägen darauff gebraucht hat; wie Crusius libro paralip. Annal. Suevic. fol. 85 in Beschreibung der Statt Lindaw / bezeuget. Es ist diese ReichsStatt Buchorn / deren Monatlicher Anschlag / fünff zu Fuß / oder zwantzig Gülden / vnd zu Vnderhaltung deß CammerGerichts 50. vor Jahren nur 30. Gülden Jährlich / nicht groß im Gezirck / aber wolhabend. Hat jhre zugehörige Dörffer / Höff / vnd Gericht. Trägt jhren Namen von dem Buchwald / der sich vor Zeiten biß an den Boden-See gezogen hat. Es seyn von Romißhorn hieher zur See 7275. Klaffter. Hat etwan eygene Grafen gehabt / nach deren Absterben sie auff die Grafen von Altorff vnd Ravenspurg / vnd nach derselben ingleichen Abgang / an das Reich kommen ist; dahin sie entweder die Käyser gezogen; oder sie sich ledig gemacht / vnnd selbsten an das Reich begeben. Hat ein vornehme Gräd / vnd Niderlag der Güter / so von S. Gallen vnd Steinach / vber See / vnd fürter in Schwaben / vnd zurück gehen. Es hat ein reiches Frawen-Closter bey der Statt / vor Zeiten Liebenthal / nachmals Löwenthal / genandt / so grosses Eynkomen: wird von Hanß Georg Schlehen / Hofen genandt. Anno 1291. oder 1292. ist Buchorn vom Bischoff zu Costantz / vnd dem Abt zu S. Gallen eyngenommen / aber nicht lang behalten worden. Anno 1363. ist sie / sampt allen jhren Privilegien / in Grund abgebronnen. Anno 1634. ist sie von den Schwedischen sehr fortificirt / aber folgends / nach der Nördlinger Schlacht / von jhnen freywillig verlassen worden. Sie ist vnter dem Schutz der Statt Vberlingen / vnd jhre Herrschafft Bomgarten vnter der hohen Obrigkeit der Landtvogtey Schwaben. Munsterus, Crusius, Magerus, & Acta Publica.