Topographia Westphaliae: Werle

Werle / Werla.

In Westphalen / Stättlein / vnd vestes Schloß / dem Ertzstifft Cölln gehörig / allda der eine Officialis Judex Archiepiscopalis Coloniensis, so Arnsbergensis genannt wird / residieret. Wird zur Graffschafft Arensberg gerechnet. Ligt zwischen den Wassern Lippe / vnnd der Ruhr / jedoch näher bey der Ruer. Von diesem Ort / dahin sich Keyser Heinrich der Erste / bey der Hunnen Einfall / wegen mehrer Sicherheit / begeben / ist insonderheit Johan. Angelius à Werdenhagen de Rebuspubl. Hanseat. part. 3. cap. 5. p. 224. zulesen.

Anno 1586. hat Martinus Schenck das besagte veste Schloß / vergebens belägert / wiewol er das Stättlein erobert hat: Aber Anno 1633. den 17. Octobris / hat Landgraff Wilhelm auß Hessen / erstlich das Stättlein / vnnd darauff den 1. Novembris auch das Schloß / mit Accord / erobert. In dem Anno 1644. wider zu Ambsterdam außgangenem Atlante stehet: Daß Werla seye deß Hertzogthumbs Westphalen Hauptstatt: Lige auff einem fetten / vnnd fruchtbaren Boden / habe viel Saltzpfannen / vnd ein schönes Rahthauß. Das besagte Hertzogthumb Westphalen / habe gegen Auffgang / die Grafschafft Waldeck / von Mittag / das Hessische Gebürge; gegen Nidergang das Märckische Land / von Mitternacht / die Bischthümber Münster / vnd Paderborn. Diß Hertzogthumb begreiffe heutiges Tags die Graffschafft Arensberg / vnnd das vbrige Theil von dem Hertzogthumb Angern / dessen Gräntzen schwerlich zubeschreiben seyen; sintemal von demselbigen nichts mehr / dann das eintzige Dorff Engern in der Graffschafft Ravensberg vbrig / etc. Vnd dann / so wird wider von den Nachbarn dieses Lands daselbsten / gesagt: Daß selbige seyen / die Marck / Münster / Lippe / Paderborn / Waldeck / Hessen / vnnd die Graffen vom Westerwald. Oberwehnte Graffschafft Arensberg habe / ausser der Hauptstatt / noch etliche andere Stättlein / als Hohestatt an der Lippe / Geseke / Ervete / Aenruchte / Molheim an dem Mon / Nienhuß an gedachtem Fluß / Neim / Hüllinckhoven / Olinckhusen / Herstberg / Brilon / Meschede an der Ruhr / Sunderen / Oldendolp / Fredeborg / Medebach / etc. Vber diß befinden sich etliche fürnehme Ort / als Wedinckhusen / vnd andere / so alte Gebäwe / vnd deß Witikindi Schlösser / vnd Wohnungen / gewesen / etc. Gegen Nidergang / beydem Stättlein Balve / sey ein grosse Höhle / dessen Außgang / oder Ende / man nicht wisse. Siehe vnten im Anhang / Brilon.