Topographia Sueviae: Offenburg
Ein ReichsStatt in der Mordnaw / so von einem / Offo genandt / den Nahmen haben soll / welcher vmbs Jahr 605 in diese Gegend kommen / vnd bey dem Fluß Schutter ein Kloster zuerbawen angefangen / so Offonis Cella, der nächste Orth aber darbey Offonis Villa, ins gemein Offonisvvillara, Offenweiler / ist genandt worden. Von diesem Offone nun ist / wie man sagt / auch diese Statt Offenburg an der Kyntzig erbawet / vnnd Offonis Pyrgum geheissen worden / so nur ein MeilWegs von gedachtem Closter Offenzell gelegen. Von diesem Offone weiset man noch eine Müntz / die alten Offenburger / vnd Englische Pfenning genandt / deren man ein grosse Anzahl gefunden / als zu Straßburg Anno 1562. S. Clarae Kloster auff dem Werd abgebrochen ward. Es soll gemeldter Offo deß Königlichen Englischen Geblüts gewesen / vnd von dem König in Austrasien diesem Land vorgesetzt worden seyn; wiewol Theils daran zweiffeln wollen. Ist ein hüpsche wol erbawete / aber kein grosse / zwo Meilen von Straßburg gelegene Statt / der Römisch-Catholischen Religion / daselbst die Kirchen / vnd ein schöne Capelln beym Spital / neben dem Rathhauß / am meisten zu sehen. Ihr Monatlicher: Reichs vnd Craiß-Anschlag ist / dieser Zeit hundert vnd zwantzig Gulden. Vnd zu Vnderhaltung deß Cammergerichts Jährlich 28. Gulden / oder 28. fl. 21. Kreutzer 3. Heller.
Es hate etwan der Bischoff zu Straßburg auch der Marggraf zu Baden / deme sie vom Reich versetzt / vnnd wider vom Bißthumb Straßburg gelößt worden / da zu gebieten gehabt / vnd solle vom Bischof Wilhelm zu Straßburg dem Käyser Ruprechten das halbe Theil an Offenburg geben worden seyn: Wiewol sich in einer Straßburgischen Chronick befindet / daß Offenburg / vnd Gengenbach / noch An. 1428 / dem Stifft Straßburg gehört haben.
Anno 1632. den 31. Augusti / haben die Schwedischen Granaten in die Statt geworffen / vnd mit Stücken hinein geschossen / [148] auch halbe Carthaunen vor die Pforten gestellt / vnnd also den 2. Septembr. die Statt zum Accord gezwungen. Vnd ist die Käyserische Guarnison dreyhundert zu Fuß / vnd hundert vnd zwantzig Pferdt starck / außgezogen.
Nach etlichen Tagen ward beschlossen / daß die Offenburger sich / als Erb- vnd Leibeygene Vnderthanen / eydlich verbinden solten / dem König in Schweden trew / vnd hold zu seyn. Die Burgerschafft wurde gantz disarmirt, vnnd ein zimlicher Vorrath an Munition / Proviand / vnd Stücken / allda gefunden. Anno 1635. kam die Statt wider in den alten / vnd Schwäbischen Reichs- vnd Crayßstandt. Munsterus in Cosmogr. Crusius in Annal. Suevic. Hertzog in der Elasasser Chronick lib. 3. cap. 13. Item / geschrieben- vnd gedruckte Relationes.
Ein MeilWegs von Offenburg / vnnd etwas weiters vom Rhein / ligt das Schloß Ortenburg / in der Mordnaw / so die Schwedischen Anno 1632. mit Accord eyngenommen haben.