Topographia Sueviae: Engen
Ligt vier Stund von Schaafhausen / im Hegöw. Ist vorhin Lupfisch / hernach Pappenheimisch gewesen / vnd / nach Absterben Herrn Reichs Marschallen / vnd Graffen Maximiliani von Pappenheim / an Fürstenberg kommen / weiln ein Graf von Fürstenberg sein deß Herrn von Pappenheim einige Tochter gehabt. Gehört in die Reichs-Herrschafft Hewen / oder Heben / vnnd ligt solch Schloß Hewen ob dem Stättlein. Anno 1640. ward Statt vnd Schloß mit Sturm von den Breysachern erobert / geplündert / vnd biß auffs Schloß abgebrandt.
Im Vorstättlein / vnd desselben Kirchen zu S. Martin / ligen die Herren / vnnd Frawen von Hewen begraben: Vnd ist derselben Stamm Haus / oder Schloß Hohen Heuuen / oder Hewen / vber dem besagten Stättlein Engen / dahin solches auch gehört. Sie seyn von den Grafen zu Ziegenheim in Hessen herkommen / vnd haben sich von dannen in das Hegöw begeben. Der Letzte auß ihnen war Albertus Arbogastus Freyherr von Hewen / Fürstl. Würtemberg. Landvogt zu Mümpelgart / so Anno 1570. den 15. Febr. gestorben. Hernach haben die Graffen von Lupfen dieses Schloß Hewen / vnnd Stättlein Engen / gehabt / deren der letzte Henricus, Graf zu Lupffen / Landgraf zu Stülingen / vnd Herr zu Hohenhewen / vnd Roßneck / An. 1582. den 26. Decembris gestorben / vnnd allhie zu Engen begraben worden ist. Sihe vnden Stülingen. Es ist der Graffschafft Lupffen Monatlich einfacher Anschlag 120. Gulden / vnd zum Cammergericht jährlich 37. Gülden. In den Zeitungen ist einkommen / es hätten die Erlach: vnd Hattsteinischen auß Breysach / An. 1640. zu Eingang deß Julij / sich dieses Stättleins / vnd Schlosses bemächtigt / von 300. Soldaten / vnnd in Waffen befundener Burgerschafft / viel darnider gemacht / das Schloß / vnnd Statt Pforten in Brand gesteckt / die Ernd eingemachet / Hohendwiel davon sehr ergeblich Proviantirt / vnnd in 150. Gefangene / mit Beuten / hinweg geführt. Item / im Jahr 45. daß damaln der Herr Commendant auff Hohendwiel die Mauern zu Engen nidergerissen / vnd die Thor abgebrandt. Musten also zwischen dem 40. vnd 45. Jaren / die Thor wider seyn gemacht worden. Acta Publ. & Relationes.
[T22]
