Ein vestes Fürstlich Württembergisch Berg Schloß: Dabey / vor Jahren / auch ein Stättlein gelegen / welches aber / auß Rath Landgraff Philipsen zu Hessen / Hertzog Vlrich von Würtemberg / herab vnter den Berg gesetzt / vnnd ein Dorff / Vnter Asperg genandt / darauß gemacht. Crusius schreibet / part. 3. Annal. fol. 628. Wann man es Weichenberg nenne / so könne man bald der Bauern Flegel versuchen. Nach der Nördlinger Schlacht / haben sich die Käyserischen der obernanten Vestung Hohen Asperg bemächtigt: Die aber An. 1649. nach dem General Frieden Schluß / Herren Eberharden / Hertzogen von Würtemberg / etc. restituirt worden ist.
