Topographia Braunschweig Lüneburg: Medingen

Medingen.

Ein Fürstliches Lüneburgisches Ampthauß vnd Closter / an der Elmenau gelegen. Von dieses Closters Stifft- vnd Erbawung melden die dabey verhandene Vhrkunden / daß im Jahr Christi 1228. ein Layenbruder / Nahmens Johannes / Cistercienser Ordens / auß dem Closter Wolmerstätt / im Ertzstifft Magdeburg / vier Jungfern geholet / welche er in das Fürstenthumb Lüneburg zu erst nacher Stedekenstorff / hernachmals nach Plate gebracht. Folgends hat ihr Probst eine Capelle zu Loendorff / im Kirchspiel Alten Medingen gelegen / erbawet / zu dem Dintze genant / woselbst sie ihre Gemeine vermehret / vnd geblieben / biß ins Jahr 1261. in welchem das Closter zu Alten Medingen erbawet. Es hat aber die Versamlung / wegen mangel deß Wasseres der Mühlen / vnd daß die Heerstrasse durch den Hoff gangen / daselbst nicht bleiben können / derentwegen der damahliger Probst vnd Abtissin einen andern Ort vnd Stelle / das Dorff Zellensen genant / mit Mühlen / Fischereyen / Höltzungen / Freyheiten / vnd allen Zubehörungen / von den Rittern den Groten / im Jahr 1324. erhandelt / von Alten Meding sich dahin begeben / vnd Anno 1333. das jetzige Closter zu bawen angefangen / welches dann / sampt der Kirchen / Probsteye / vnd andern nohttürfftigen Gebäuen / Anno 1336. fertig worden.

Im Jahr 1541. haben Hertzog Ernst zu Braunschweig Lüneburg / vnd dessen Gemahlin / Fraw Sophia / geborne Hertzogin zu Mechlenburg / bey demm Closter das Fürstliche Ampthauß erbawen lassen / so noch anjetzo verhanden / vnd in gutem Stande erhalten wird.