Topographia Bavariae: Wembding

Wembding / oder Wending.

Ligt im Rieß / zwischen Schwäbisch Oeting / vnd Monheim / nit sonders weit von dem Closter Käysersheim / vnnd dem Fluß Wernitz / bey anderthalb Meilen von Nördlingen / 2. von Oetingen / vnd 2. von Thonauwerdt / vnd ist Chur Bäyern gehörig. Ist nit groß / aber ein schöne Statt / sampt einem Schloß / vnnd Ampt. Hat vor dem jetzigen Krieg vil Schaaf / vnd Rinder da geben / vnd hat man gute Creutzkäse allhie gemacht. Der Boden herumb ist sumpfficht. Auf 2. Büchsenschuß davon ligt ein gutes Bad / welches dienet für den Schlag / Fraiß / kalte Flüß / böß Gehör / Zipperle / Darmgicht / böß Miltz / Contraction, Geschwer / Wunden / Schäden / Gelsucht / Stein / Krampff / Zittern / Hufftwehe / Blutspeyen / Vndäwen / vbrigen Fluß der Rückadern / weissen Weiberfluß / vnd denen die Kinder abgehen; dienet dem Gesicht / ist gut fürs Keichen; wie Crusius part. 2. Annal. Suev. fol. 57. b. part. 3. f. 80 vnd lib. paral. c. 12. fol. 50. von diesem was gesagt / vnnd wie Wembdingen an das Hauß Bäyern kommen seyn solle / zu lesen.

Andernacus sagt / daß die Wasser zu Wembdingen / welche beym Fewer müssen gewärmet werden / die Taubheit / vnnd die Winde in den Ohren benemmen. Bauhinus schreibet / daß solche die Flüsse / vnd die Wassersucht / vertreiben; seyen auch gut wider die Stein der Nieren / vnd Blasen / also daß / da einer von einem Wund Artzt vbel geheilet worden / nach dem er dieselbe Wasser gebraucht / noch 40. Steine von ihm kommen seyen: Es helffe auch denen / sagt er / die den Harn nit halten können.