Topographia Bavariae: Kelheim

Kelheim.

Es gehört diese in Nieder-Bäyern an der Thonaw (in welche allda die Altmühl kompt) vnd 3. Meyl Wegs oberhalb Regenspurg gelegene Statt in die Fürstl. Bäyerische Regierung / oder RentAmpt Straubing; hat ein Landgericht / in welchem die 2. Märckt / Langwayd / vnd Schiering / 4. Clöster / 2. Schlösser / 13. Sitz / 18. Hoffmarchen / neben den Dörffern / Höffen vnd andern Gütern / gelegen seyn. Hertzog Otto auß Bäyern / deß Wittelspachischen Stammes der Erste / machte Kelheim zu einer Statt / da vormals das Schloß stund / das viel weiter / dann jetzt / ist gewest / wie Avent. im 7. Buch am 372. Blat meldet / vnd daß er fünde / daß die alten Fürsten ihre Hoffhaltung da gehabt haben; vnnd daß gedachtes Hertzogs Otten Sohn / Hertzog Ludwig / hernach An. 1231. den 16. Sept. allhie / auff der Brücken (von einem Meuchelmörder / wie Brunn. part. 3. p. 683. seq. wil) erstochen worden seyn / am 375. Blat schreibet; auch vorhero im 6. Buch / am 367. b. Blat berichtet / daß Käyser Conrad der Dritte / nach dem er mit Hertzog Welphen Fried gemacht / jhme Märding / vnnd andere Flecken geben / hernach Landgraf Otten von Wittelspach / zu Kelheimb / zwischen der Thonaw vnnd Altmühl / weil wider jhn geklagt worden / vberzogen habe. Anno 1633. den 20. Ocobr / ist diese Statt / mit Gewalt / von Hertzog Bernharden zu Sachsen / vnnd hernach An. 34. den 16. Junij von den Käys. vnd Bäyrischen / mit Accord wider erobert worden. Es ist bey Kelheimb ein Barfüsser / oder Franciscaner Clösterlein / auff S. Michaelis Berg / darinn aber etwan nur vier Mönch auffs meiste seyn. Ein wenig oberhalb der Statt / auch an der Thonaw / zwischen den Steinfelsen oder Mawern / ligt das Benedictiner Abbteyliche Closter Valentia / oder Weltenburg / so das erste Closter in Bäyern solle gewest seyn; wie davon mit mehrerm beym besagten Aventino; wie auch in tomo 3. Metrop. Salisb. Hundij folio 480. seqq. zu lesen. Es solle vor Zeiten in diser Gegne / die gewaltige Statt Artobriga gestanden seyn.

Anno 1633. den 20. Ocobr. ist diser Orth / in deß Hertzogs Bernhardts zu Sachsen / Weymar / Namen / vom Obersten Tupadel erstigen / vnd außgeplündert worden. Anno 34; im Jun. kam er / mit schlechtem Accord / durch Vbergab deß Obristen Fritz Ros / wider an Bäyern.