Topographia Bavariae: Abensperg

Abensperg.

In Ober Bayern gelegen / vnd in die Regierung Mönchen gehörig / am Wasser Abenst oder Abs / davon sie auch den Namen hat. Beym Antonino, vnd in Notitia Imperij, wird sie Abusina genandt. Vnd hat der bekandte Graf Babo, so 32. Söhn / vnd 8. Töchter gehabt / (wie ins gemein geglaubt wirdt / vnd auch dessen Anzeigungen allhie verhanden seyn; besiehe Andr. Brunner part. 2. Annal. lib. 9. p .767.) vor Zeiten allhie Hoff gehalten / vnd sich von diser Statt vnd Schloß geschriben. Gleich wie auch der berühmbte Bäyrische Historicus, Johannes sich von diesem Orth / so in den alten Brieffen Aventinium geheissen werden solle / Aventinum genandt hat. In einer geschriebenen Verzeichnuß stehet / daß ein Königlich Schloß allhie gewesen; wie auch ein Carmeliten Kirch / reich von Allmosen / dahin jährlich auf einem gewissen Tag vil tausend Personen kommen / denen man vil Brod außgetheilet / vnnd 28. Ochsen geschlachtet habe. Vnd solches Carmeliten Closter / so noch allhie / hat Anno 1389. Johannes Herr zu Abensperg gestifftet. Hertzog Albrecht von Bäyern / nam Abensperg / nach H. Niclaus von Abensperg (deß letzten auß diesem Geschlecht / so / nahend Freisingen / von Hertzogs Christoffen in Bäyern Soldaten vmbgebracht worden) Todt / An. 1485. ein. Dann die Herrschaft Abensperg / cum pertinentiis, so viel vom Heil. Reich zu Lehen / vnnd demselben heimbgefallen / ward durch Käyser Friederichen / Hertzog Albrechten / neben einer Summa Gelts / zum Heuratgut versprochen An. 1486. Nachmals durch Käyser Maximilian gar verkaufft vnd vergeben An. 1493. wie beym Wiguleo Hund / im Bäyerischen Stammenbuch part. 1. sub. rub. Abensperg / fol. 20. zu lesen. Ward Anno 1648. den 10. 20. Sept. von den Schwedischen eingenommen. Hat ein Landgericht / darein die Märckt Altmanstein vnd Rohr / Item 2. Clöster / 1. Schloß / 2. Adeliche Sitz / vnd andere Güter gehören.