Svmer zieret heide vnd anger vnd den walt
[93v]
Svmer zieret heide vnd anger vnd den walt·
da von manig herze balt· den lip kunrieret·
wan mag schǒwen· wohl bekleidet berg vnd tal·
da hoͤrt man die nahtegal· vnd in den ǒwen·
hie gegen froͤit sich al dú werlt gemeine·
da bi kleine· ist min froͤide zaller zit·
sit dc mir niht trostes git div svͤsse reine·
Si ist vor valsche wol behuͤt·
dú mich singen tůt·
Der ich singe vnd ǒch vil gedienet han·
dú wil sich des niht entstan· war nach ich ringe
vnbe ir hulden[WS 1] ringe ich alle mine tage·
also dc ich sorge trage die mv̊s ich dvlden
bis dc ich noh lieben trost gewinne·
von ir minne ist mir sorge gar ein [94r] trǒn·
svs trage ich den iamers sǒn· in minem sinne·
Si ist vor valsche wol behuͤt·
dú mich singen tůt·[WS 2]
Lieplich lachen· liehten ǒgen roter mvnt·
schafent hvndert tvent stvnt· min herze erkrachen·
gv̊t gebaren· da bi wol gestalten[WS 3] lip·
hat dc minnekliche wib· dú min kan varen·
si ist der wunsch vf erden sicherliche[WS 4]·
froͤiden riche ist si doch mit rehter zuht·
ich weis niender wibes fruht dú ir geliche·
Si ist vor valsche wol behuͤt·
dú mich singen tůt·[WS 5]
Zeinem male schoz ir minneklicher schinher
das sende herze min· ir minne stral
die ich tvmber iemer sidvnt bi mir trůg·
also dc ich nie gewůg den grossen kvmber
trage ich vnd ǒch ander klagen swere·
bis ein mere· mir von der liebú kvmt·
dú mich hat zefroͤide erfrvmt· dv́ seldebere·
Si ist vor valsche wol behuͤt·
dú mich singen tůt·[WS 6]
Do ir ǒgen· santen mit ir losen blike·
sa zehant dú minne ir schrike· warf an mih tǒgen·
gvͤtlich gruͤzen wart mir an der selben stvnd·
sit was ie min herze wunt· von der vil sv̊zen·
si hat mir den strik noch niht enbunden·
vnd die wunden· vngeheilet· we mir we·
da von sorge ich wies erge zemanigen stunden·
Si ist vor valsche wol behuͤt·
dú mich singen tůt·[WS 7]