Mit froͤlichem libe (Mit aufgelösten Abbreviaturen)

Mit froͤlichem libe·
mit armen vmbevangen·
ze herzen gedruket wie sanfte dc tůt·
von eime trostlichen wibe·
mit roͤselehtem wangen·
vor liebe gelachet dc froͤwet den mv̊t·
da sint zwei herzen vnd ein einiger lib·
mit worten vnderscheiden ein man vnd ein wib·
da mv̊s dv́ sorge ze stuken zúhten lebet·
reht alsam der liehtent zebrechen·
so lat si dú liebe ietweder vs ir mvnde bi langer zit ein wort niht sprechen·
da mac man kússen den svͤssesten mvnt·
der ie manne von frǒwen wart kvnt·

Ein twingen von frowen·
machet mānes herze·
bi wilen trurig vnd vnder wilen fro·
swer sol schǒwen·
svnder der hůte smerzen·
froͤide ob aller froͤide vindet er da ho·
swa sich vier arme gesliessen in ein·
nie svͤsser froͤide der svnne vberschein·
swer solhen trost weis an lieblichem wibe·
ia enist zer werlte niht besser froͤide da mit man bas die sorge vertribe·
da wirt gedrvket von zwein herzen so nahe·
lǒb wart nie so dúnne des stat man fvnde da·

Swa sich vier ǒgen·
so rehte gerne sehen·
da mvͤssen ǒch zwei herze vil holt einander si·
si gruͤssen sich vil tǒgen·
swas in mag geschehen·
froͤide vnd trvren wont in beides bi·
da brennet dú minne vor liebe als ein glůt·
dennoch grôsser wunder dú minne da tůt·
si lat sich mvnde an einander vergessen·
al da hat dú minne mit maneger hande froͤide sorge vnd truren gar vbersessen·
al da hat dú liebe die minne vberwegen·
wol irn selden die mit zúhten des pflegen·