Minne fuͤget dike leit (Mit aufgelösten Abbreviaturen)

Minne fuͤget dike leit·
mit vil sender arbeit·
der min herze ein wunder treit·
minne dú hat den gewalt·
wil si ich wirde an froͤiden balt·
anders ich bin abe gezalt·
minne swer dich minnet·
vnd dich minnen mv̊s·
der ist vnuersinnet·
wirt ime kvmbers bv̊s·
er vermidet dinen grv̊s·
Ich bin din·
minne habe genade min·

Mich gruͤste ein vil roter mvnt·
minnekliche zeiner stvnt·
sit wc ie min herze wunt·
also traf dú minne mich·
mit ir strale grimmeklich·
in min herze tǒgenlich·
von der minne grv̊sse·
mir dv́ not geschach·
dú mir da so sv̊sse·
dur min herze brach·
owe dc ichs ie gesach·
Ich bin din·
minne habe genade min·^{[WS 1]}

IR zimt wol swas si getůt·
si ist mit zúhten hohgemv̊t·
vor vntete wol behůt·
minne hat gehuset dar·
si ist nach schoͤne lieht gevar·
an ir ist der wunsch vil gar·
swer die zit vertriben·
bi der lieben sol·
der mv̊s allen wiben
iemer sprechen wol·
wan si ist aller tvgende vol·
Ich bin din·
minne habe genade min·^{[WS 2]}

Anmerkungen (Wikisource)

1. Vorlage: Jch bin din·
2. Vorlage: Jch bin din·