Komen ist der winter kalt· wafena der leide

Komen ist der winter kalt·
wafena der leide·
der vns twinget blv̊men vnd kle·
lǒbes hat er vil gevalt·
ich was vf der heide·
da siht man den rif vnd ǒch den sne·
we mir we· wes froͤwe ich mich·
dc ich aber singe·
het ich sinne so swige ich·
wan dc mich gedinge·
froͤwet son gesvnge ich niemer me·
Hvndert wundert wa si si·
in dem mv̊te ist mir dú gůte
steteklichen bi·

Wer gesach ie schoner wib·
alder bas geschaffen·
dan als ich si zeinem male sah·
ir vil minneklicher lip·
hv̊b gen mir sin klafen·
hoͤrent wie div tvgenderiche sprach·
ach vnd ach· wie tvmb ir sint·
went irs iemer triben·
úwer dienst niht froͤide git·
hohgemv̊ten wiben
gant ir tůt vns michel vngemach·
Hundert wundert wa si si·
in dem mv̊te ist mir dú gůte
steteklichen bi·^{[WS 1]}

Do dú rede ergieng alsus
mir begvnde leiden·
wan mir wc ir hulde gar verseit·
ich sprach solt ich ane kvs·
hinnan von ú scheiden·
si sprach los er weis wes ars er treit·
mir ist leit dc iemer man·
sol dar an gedenken·
alder der niht fůge kan·
ia lies ich in henken·
nv ê dc er růrte an min kleit·
Hundert wundert wa si si·
in dem mv̊te ist mir dú gůte
steteklichen bi·^{[WS 2]}

Anmerkungen (Wikisource)

1. Vorlage: Hund̾t wūd̾t·
2. Vorlage: Hundert wūd̾t·