Ich wil der vil lieben singen

ICh wil der vil lieben singen· disen sang
dú min herze tǒgenlichen· hat verwunt·
si kan swere an allen dingen· machen kranc·
nieman kan sich ir gelichen· dast mir kvnt·
nv warvmbe lobte si
moͤht ichs niht beweren·
mit ir zúhten wol·
si vor allen tadel vri·
vnd vor boͤsen meren·
da bi ist ir herze tvgenden vol·
Frowe ir hant mich vber wunden· svnderbar·
iv ze dienst in kvrzen stunden dc ist war·

Tvgenderichú· reine frowe· selig wib·
ǒgent an mir úwer gvͤte· vnd alle zuht·
als dú rose in meien tǒwe· ist úwer lib·
vnd der gilye in wunne blvͤte· an siner fruht·
ich wil úwer diener sin·
nach dem svͤssen lone·
dc ir troͤstent mich·
vnd ir wendent minen pin·
aller tvgende ein krone·
gar an allen wandel minneklich·
Frowe ir hant mich vber wunden· svnderbar·
iv ze dienst in kvrzen stunden dc ist war·^{[WS 1]}
 
Wunneklicher ǒgenweie ich nie gesach
danne der vil wol getanen· múndel rot·
si ist vor allen herzeleide· ein schirme ein tach·
swer si siht der mv̊s sich anen· sender nôt·
wil dú minne mir gestan
gen der minneklichen·
seht so wurd ich vro·
so wolde ich die sorge lan·
vs dem herzen slichen·
minneklichú minne· fuͤge es so·
Frowe ir hant mich vber wunden· svnderbar·
iv ze dienst in kvrzen stunden dc ist war·^{[WS 2]}

Anmerkungen (Wikisource)

1. Vorlage: Frowe ir·
2. Vorlage: Frowe ir hant·