Ich wil der vil lieben ſingē
[91r]
ICh wil der vil lieben ſingē· diſen ſang
dú min h̾ze tǒgenlichē· hat v̾wunt·
ſi kan ſw̾e an allen dingē· machē kranc·
niemā kan ſich ir gelichē· daſt mir kvnt·
nv warvmbe lobte ſi
moͤht ichs niht bewerē·
mit ir zúhten wol·
ſi voꝛ allē tadel vꝛi·
vn̄ voꝛ boͤſen m̾en·
da bi iſt ir h̾ze tvgēdē vol·
Frowe ir hant mich vb̾ wūdē· ſvnd̾bar·
iv ze dienſt in kvrzen ſtundē dc iſt war·
Tvgēderichú· reine frowe· ſelig wib·
ǒgent an mir úw̾ gvͤte· vn̄ alle zuht·
als dú roſe ī meien tǒwe· iſt úwer lib·
vn̄ d̾ gilye in wūne blvͤte· an ſiner fruht·
ich wil úwer diener ſin·
nach dē ſvͤſſē lone·
dc ir troͤſtent mich·
vn̄ ir wendēt minē pin·
aller tvgēde ein krone·
gar an allē wandel mīneklich·
Frowe ir hant mich vb̾ wūdē· ſvnd̾bar·
iv ze dienſt in kvrzen ſtundē dc iſt war·[WS 1]
Wunneklicher ǒgēweie ich nie geſach
dāne d̾ vil wol getanē· múndel rot·
ſi iſt voꝛ allē h̾zeleide· ein ſchirme ein tach·
ſw̾ ſi ſiht d̾ mv̊s ſich anē· ſend̾ nôt·
wil dú mīne mir geſtā
gen d̾ mīneklichē·
ſeht ſo wurd ich vꝛo·
ſo wolde ich die ſoꝛge lan·
vſ dē h̾zen ſlichē·
mīneklichú mīne· fuͤge es ſo·
Frowe ir hant mich vb̾ wūdē· ſvnd̾bar·
iv ze dienſt in kvrzen ſtundē dc iſt war·[WS 2]