Herre wenne sol ich si sehen

Herre wenne sol ich si sehen·
dú mir den lip betwungen hat·
ine getars vor gotte niht veriehen·
alse kvmberlich vnd es mir stat·
Jch habtes gerne gv̊ten rat·
wie ich zer schonen solte komen·
dú mir die sinne hat benomen·
ir mvnt ist rot·
ine gerúwe ir an ir arme so bin ich tot·

Io froͤwe ich mich der lieben zit·
dú vns da nahet zallen tagen·
die vogel singent enwider strit·
si hant verlazen gar ir klagen·
ich wil iv guͤtú mere sagen·
ich horte die nahtegal wol singen·
min herze mv̊s nach froͤiden ringen·
si ist so gv̊t·
Minne dv maht mich bas betwingen· danne ieman tůt·

Des dienstes duhte mich vil kleinen·
den ich der schonen han getan·
vnd wolte sis mit trúwen meinen·
so wêr ich ein selig man·
si mag mich wol zetode slan·
vnd doch da bi vil schone vf halden·
min herze mv̊s in froͤiden alden·
si ist so gv̊t·
Minne dv maht mich bc betwingen·
danne ieman tůt·