Got gewaltic was du schikest
[383v]
GOt gewaltic was du schikest·
wunderlicher dinge ân allen mein·
Fúr der himel dach dv blikest·
vnd dvrh der[WS 1] helle dilestein·
Heý wie dú mit kraft verzwikest·
din almehtekeit dú nie verswein·
Wan dv dich an vrhab strikest·
vnd an ende dringest vnder ein·
Din maiestat in einen knopf
driualt sich wirret vnd leit·
Ir vesten ewekeite zopf·
geflohten ist an vnderscheit·
Nv schenke vns in des herzen kopf·
der waren minne svͤssekeit·
Dv truͤge wilent grawen schopf·
dem ist ein ander schin bereit·
Jvncherre wis· dv were gris·
nv zieret dich ein brvner vahs·
do menschlich wart· din bilde zart·
do war sich vnder siden flahs·
Vns flos dar heim· din honges seim·
wan der barc sich in vnser wahs·
da von sin ort zeivngest dort·
Vns kere niht sin spizig sachs·
Vns sol helfen alremeist·
dc du[WS 2] menschlichú zeichen treist·
dir wab ein kleit der frone geist·
mit goͤtlichen kammen·
in der megde libe gůt·
warf vnd weuel wc ir mv̊t·
Aue dc wort alsam ein glůt·
begonde ir herze enpflammen·
das gab ir so heissen ruch·
dc si dich dvrh den selben spruch·
ze kinde enpfienc an allen brvch·
in ir vil kv́schen wammen·
Din grůs ir durh dú oren dranc·
der von des engels mvnde klanc·
da von dv lies an allen wanc·
si werden zeiner ammen·
Din gewalt· manicvalt·
der mahte nah ir kv́schem libe dich gestalt·
alsam nach einem glase dú svnne verwet sich·
swa si ganz· an allen schranz·
durh es geschinet da gelichet sich ir glanz·
sich also mâlte nach ir dú ivncfrowe dich·
wan ir mv̊t· rein vnd gv̊t·
nach hohem flîsse streich dir an fleisch vnd blůt·
ir edel herze alsam dú svnne luterlich·
wart ein schrin· da slos sich in·
svn vater vnd geist· doch wart eht vs in drin·
der svn gezeichent nach ir bilde wunneklich·
Din figure wart gestempfet·
in ir kúschen form insigel·
dc den tiefel vberkempfet·
der sich rimpfet als ein igel·
vnd in fúre lit verkrempfet·
siner heissen flammen tigel·
wolde vns han mit rǒch erdempfet·
do vieng in der sorgen rigel·
Got herre dur din heilig blůt·
dv́ súnde erlasch vnd ir geheý·
din ǒge vns arme hat behůt·
alsam der wilde strus sin ei·
des loͤwen welfer lebende tůt·
sin wuͤfen vnd sin geschrei·
also brach an dem krúze gůt·
des todes bant din růf enzwei·
Dv woldest sin vf erden gast·
vnd ein ellender pilgerin·
so dc zehimel niht gebrast·
der almehtigen sterke din·
geist vnd vater ane last·
beliben dvr des svnes pin·
vnd wc iedoch ir beider glast·
bi dir ein gotlicher schin·
Heý wc dv genaden leist·
an die sv́nde siechen·
wan dv liesse dinen geist
vs dem mvnde riechen·
do wart in gesvnt·
ir gemvͤte wunt·
din aten verlust genv̊g·
schv̊f dem helle more·
dc er in zetode slůg·
mit dem svͤssen trore·
der von im da gienc·
vnd den slangen vienc·
Das pantier ist dir gelich·
dc mit sinem smake·
manig svͤssekeite rich·
fuͤget dc der trake·
svnder wider strit·
tot von ime gelit·
also wart der helle wurn·
sige los gestreket·
ane kampfes wider stvrn·
do von ime gesmeket·
wart din aten ǒch·
der nach wunsche rǒch·
Dine wunden· vns enbvnden·
von des todes smerzen·
altú missewende gros·
wart vertrochen· do gestochen·
zv̊ dim edeln herzen·
wart ein sper scharpf vnd blos·
herre gůter· diner mv̊ter·
sinne svnder lǒgen·
wurden iamers vil gewert·
wan din marter· dranc vil harter·
dvr ir sele tǒge·
danne ein wol gesliffen swert·
Sich bewârte an dir dc wort·
dc ir seiten sýmeon·
do man rech der lanzen ort·
herre in dine siten fron·
dc si wart dar in gebort·
dc gêb vns so richen lon·
das vns zúg[WS 3] an heiles port·
dines grimmen endes don·
Hilf vns von dem wâge vnreine·
klebender sv́nden zv̊ dem stade·
dc vns iht ir agtsteine·
zúhen[WS 4] von gelúkes rade·
dinen svn den crucifixen·
heis vns leiden vs dem bade·
der vertanen wasser nixen·
dc vns ir gedoͤne icht schade·
Ich zel dich zv̊ dem swanen blank·
der an sim ende singet sank·
[384r] din schrei verdranc· sýrenen klanc·
der dones vanc· zegrvnde zoch der sv́nden kiel·
din helfe vns an dem slangen rach·
der vns den apfel essen sach·
von dir geschach ime vngemach·
dú gift zerbrach· in der sin valsch geschihte wiel·
Sin ǒge vns wc ein mordes bik·
den wider sach din[WS 5] strv̂sses blik·
an im den sik· nam sorgen strik·
din svn den rik· verschriet im vnd des mvndes giel·
Alsam dc hermlin den vnk·
verseren mac in siner tvnk·
altherre ivng· din gallen trunk·
lert in den sprvng· an dem er sich ze tode erviel·
Vs núwen súnden vns enbint·
din helfe wol gereinet hat·
von alten schulden dinú kint·
wan dv fúr vnser virne missetat·
wurde in den wag getúhet·
alsam der helfant mit genvht·
in wasser luterlich gevar·
enpfahet siner kinde fruht·
also enpfienc vns vnd wider gebar·
din tǒf der súnde schúhet·
Din heilig tǒ wart vns gesant·
dc gruͤne machet vnser hoͤi·
dv liesse ein roseriches lant·
vnd iltes her in vnser armes goͤi·
mit dornen wol gerúhet·
Man iagte dich vf kúsche gros·
als es dins vater minne enbot·
des sv̊chtest dv der megde schos·
alsam der wilde einhúrn in siner not
ze der ivncfrowen flúhet·
Din fron almehtekeit·
sterkú wort mit eweklicher stete·
barg sich in eren kleit·
dc wol zierent[WS 6] reiner tvgende[WS 7] nete·
dir wart an dich geleit·
magtv̊mlichú kúsche zeiner wete·
die dir din tohter sneit·
dú zekinde dich enpfangen hete·
Wilder schepfer wunderhaft·
ia gebar dich din geschaft·
vnd dú creatúre din·
dinen glanz verdahter ir schin·
dc mac wol ein wunder sin·
aller wunderlichen kraft·
dvrh sin tǒgenlich geberg·
slǒf ein rise in ein getwerc·
do din bilde almehteklich·
hal in kindes forme sich·
werkman hoh dv woldest dich·
lan verseren din antwerc·
Vns heilte diner wunden tǒ·
do dich vnser tot gerǒ·
den vns din zorn durh sv́nde brô·
dú tet alsam der pellican·
der sich wil gerúwen lan·
swc siner frúhte wirt getan·
der machet lebende siniv kint·
dú mit sinem blůte sint·
erkiket schiere an vnder bint·
also vertreib vns wernde not·
din blůt als ein rose rot·
do dich erbarmet vnser tot·
Wol dir himel fúrste·
das nach menschen heile·
din gemuͤte dúrste·
selde wart vns veile·
do der studen húrste·
wart ein fúr zeteile·
Si wart schone enpfenget·
von hize als ein zunder·
doch wart ir verhenget·
fúr ein kúnftig wunder·
dc vil vnbesenget·
stůnt ir lǒp dar vnder·
Da wart vns bezeichent an·
fúr ein wares mere·
dc din mv̊ter dich gewan·
svnder alle swere·
si beleib kúsche ane man·
vnde sv́nden lere·
do von dinem geiste enbran·
ir lib wunnebere·
Si vil svͤssú mvͤsse gar·
vns von hǒbet sv́nden loͤsen·
ir lop blvͤmen vnd roͤsen·
solten alle zvngen·
Ir lip truter· luter· var·
trůc dich her also zeherzen·
dc nie von dekeinem smerzen·
wart ir lib betwungen·
Hilf vns allen· wallen dar·
da mit richer engel doͤnen[WS 8]·
werde ein ewig pris der schoͤnen[WS 9]·
svnder zil gesvngen·
Tv̊ von swachen· sachen· bar[WS 10]·
vns vil armen vf der erden·
laz[WS 11] von dinen hulden werden·
niemer vns verdrvngen· amen·