Got gewaltic was du ſchikeſt
[383v]
GOt gewaltic was du ſchikeſt·
wunderlicher dinge ân allen mein·
Fúr der himel dach dv blikeſt·
vn̄ dvrh der[WS 1] helle dileſtein·
Heý wie dú mit kraft v̾zwikeſt·
din almehtekeit dú nie v̾ſwein·
Wan dv dich an vrhab ſtrikeſt·
vn̄ an ende dꝛingeſt vnder ein·
Din maieſtat ī einen knopf
dꝛiualt ſich wirret vn̄ leit·
Jr veſten ewekeite zopf·
geflohtē iſt an vnderſcheit·
Nv ſchenke vns ī des h̾zen kopf·
der warē minne ſvͤſſekeit·
Dv truͤge wilent grawen ſchopf·
dē iſt ein ander ſchin bereit·
Jvncherre wis· dv were gris·
nv zieret dich ein bꝛvner vahſ·
do menſchlich wart· din bilde zart·
do war ſich vnder ſiden flahs·
Vns flos dar heim· din hongeſ ſeim·
wan der barc ſich ī vnſer wahs·
da vō ſin oꝛt zeivngeſt doꝛt·
Vns kere niht ſin ſpizig ſachs·
Vns ſol helfen alremeiſt·
dc du[WS 2] mēſchlichú zeichen treiſt·
dir wab ein kleit der frone geiſt·
mit goͤtlichē kammē·
in der megde libe gůt·
warf vn̄ weuel wc ir mv̊t·
Aue dc woꝛt alſam ein glůt·
begonde ir h̾ze enpflammen·
das gab ir ſo heiſſen ruch·
dc ſi dich dvrh den ſelben ſpꝛuch·
ze kinde enpfiēc an allen bꝛvch·
in ir vil kv́ſchen wāmē·
Din grůs ir durh dú oꝛen dꝛanc·
der vō des engels mvnde klanc·
da vō dv lieſ an allen wanc·
ſi w̾den zeiner ammē·
Din gewalt· manicvalt·
der mahte nah ir kv́ſchem libe dich geſtalt·
alſam nach einem glaſe dú ſvnne verwet ſich·
ſwa ſi ganz· an allen ſchꝛanz·
durh es geſchinet da gelichet ſich ir glanz·
ſich alſo mâlte nach ir dú ivncfrowe dich·
wan ir mv̊t· rein vn̄ gv̊t·
nach hohē flîſſe ſtreich dir an fleiſch vn̄ blůt·
ir edel h̾ze alſam dú ſvnne luterlich·
wart ein ſchꝛī· da ſlos ſich in·
ſvn vater vn̄ geiſt· doch wart eht vs in dꝛin·
der ſvn gezeichent nach ir bilde wūneklich·
Din figure wart geſtempfet·
in ir kúſchen foꝛm inſigel·
dc den tiefel vberkempfet·
d̾ ſich rimpfet als ein igel·
vn̄ in fúre lit v̾krempfet·
ſiner heiſſen flammē tigel·
wolde vns han mit rǒch erdempfet·
do vieng in der ſoꝛgē rigel·
Got herre dur din heilig blůt·
dv́ ſúnde erlaſch vn̄ ir geheý·
dī ǒge vns arme hat behůt·
alſam d̾ wilde ſtrus ſin ei·
des loͤwen welfer lebēde tůt·
ſin wuͤfen vn̄ ſin geſchꝛei·
alſo b̋ch an dem krúze gůt·
des todes bant din růf enzwei·
Dv woldeſt ſin vf erden gaſt·
vn̄ ein ellender pilgerin·
ſo dc zehimel niht gebꝛaſt·
der almehtigē ſterke din·
geiſt vn̄ vat̾ ane laſt·
beliben dvr des ſvnes pin·
vn̄ wc iedoch ir beider glaſt·
bi dir ein gotlicher ſchin·
Heý wc dv genaden leiſt·
an die ſv́nde ſiechen·
wan dv lieſſe dinē geiſt
vs dem mvnde riechen·
do wart in geſvnt·
ir gemvͤte wūt·
din aten v̾luſt genv̊g·
ſchv̊f dem helle moꝛe·
dc er in zetode ſlůg·
mit dē ſvͤſſē troꝛe·
der vō im da gienc·
vn̄ den ſlangē vienc·
Daſ pantier iſt dir gelich·
dc mit ſinem ſmake·
manig ſvͤſſekeite rich·
fuͤget dc d̾ trake·
ſvnder wider ſtrit·
tot vō ime gelit·
alſo wart d̾ helle wurn·
ſige los geſtreket·
ane kampfes wider ſtvrn·
do von ime geſmeket·
wart din aten ǒch·
der nach wūſche rǒch·
Dine wundē· vns enbvnden·
vō des todes ſmerzē·
altú miſſewende groſ·
wart v̾trochē· do geſtochē·
zv̊ dim edeln h̾zen·
wart ein ſper ſcharpf vn̄ blos·
h̾re gůt̾· diner mv̊ter·
ſinne ſvnder lǒgen·
wurdē iam̾ſ vil gew̾t·
wā din marter· dꝛanc vil harter·
dvr ir ſele tǒge·
dāne ein wol geſliffen ſw̾t·
Sich bewârte an dir dc woꝛt·
dc ir ſeitē ſýmeon·
do man rech der lanzē oꝛt·
h̾re in dine ſitē fron·
dc ſi wart dar in geboꝛt·
dc gêb vns ſo richen lon·
das vns zúg[WS 3] an heiles poꝛt·
dines grimmē endeſ don·
Hilf v̄s vō dem wâge vnreine·
klebender ſv́ndē zv̊ dem ſtade·
dc vns iht ir agtſteine·
zúhen[WS 4] vō gelúkes rade·
dinen ſvn den cͮcifixen·
heis vns leidē vs dē bade·
der v̾tanen waſſer nixen·
dc vns ir gedoͤne icht ſchade·
Ich zel dich zv̊ dē ſwanē blank·
d̾ an ſim ende ſinget ſank·
[384r] din ſchꝛei v̾dꝛanc· ſýrenen klanc·
der dones vanc· zegrvnde zoch der ſv́ndē kiel·
din helfe vns an dem ſlangē rach·
d̾ vnſ den apfel eſſen ſach·
vō dir geſchach ime vngemach·
dú gift zerbꝛach· in der ſin valſch geſchihte wiel·
Sin ǒge vns wc ein moꝛdes bik·
den wider ſach din[WS 5] ſtrv̂ſſes blik·
an im den ſik· nam ſoꝛgē ſtrik·
din ſvn den rik· v̾ſchꝛiet im vn̄ des mv̄des giel·
Alſam dc h̾mlin den vnk·
v̾ſeren mac in ſiner tvnk·
altherre ivng· din gallē trunk·
lert in den ſpꝛvng· an dem er ſich ze tode erviel·
Vs núwen ſúnden vns enbint·
din helfe wol gereinet hat·
vō alten ſchuldē dinú kint·
wā dv fúr vnſer virne miſſetat·
wurde in den wag getúhet·
alſam der helfant mit genvht·
in waſſer luterlich gevar·
enpfahet ſiner kinde fruht·
alſo enpfienc vnſ vn̄ wider gebar·
din tǒf der ſúnde ſchúhet·
Din heilig tǒ wart vns geſant·
dc gruͤne machet vnſer hoͤi·
dv lieſſe ein roſeriches lant·
vn̄ iltes her in vnſer armes goͤi·
mit doꝛnē wol gerúhet·
Man iagte dich vf kúſche gros·
als es dins vater mīne enbot·
des ſv̊chteſt dv d̾ megde ſchos·
alſam der wilde einhúrn in ſiner not
ze der ivncfrowē flúhet·
Din fron almehtekeit·
ſterkú woꝛt mit eweklicher ſtete·
barg ſich in erē kleit·
dc wol zierent[WS 6] reiner tvgende[WS 7] nete·
dir wart an dich geleit·
magtv̊mlichú kúſche zeiner wete·
die dir din tohter ſneit·
dú zekinde dich enpfangē hete·
Wilder ſchepfer wunderhaft·
ia gebar dich din geſchaft·
vn̄ dú creatúre din·
dinen glanz v̾daht̾ ir ſchin·
dc mac wol ein wunder ſin·
all̾ wūderlichen kraft·
dvrh ſin tǒgenlich geberg·
ſlǒf ein riſe in ein getwerc·
do din bilde almehteklich·
hal in kindes foꝛme ſich·
w̾kman hoh dv woldeſt dich·
lan v̾ſerē din antwerc·
Vns heilte diner wūdē tǒ·
do dich vnſer tot gerǒ·
den vnſ din zoꝛn durh ſv́nde bꝛô·
dú tet alſam der pellicā·
der ſich wil gerúwē lan·
ſwc ſiner frúhte wirt getan·
der machet lebende ſiniv kint·
dú mit ſinē blůte ſint·
erkiket ſchiere an vnder bint·
alſo v̾treib vns w̾nde not·
din blůt als ein roſe rot·
do dich erbarmet vnſer tot·
Wol dir himel fúrſte·
das nach menſchē heile·
din gemuͤte dúrſte·
ſelde wart vnſ veile·
do der ſtudē húrſte·
wart ein fúr zeteile·
Si wart ſchone enpfenget·
vō hize als ein zunder·
doch wart ir v̾henget·
fúr ein kúnftig wund̾·
dc vil vnbeſenget·
ſtůnt ir lǒp dar vnder·
Da wart vnſ bezeichent an·
fúr ein wares mere·
dc din mv̊ter dich gewan·
ſvnd̾ alle ſw̾e·
ſi beleib kúſche ane man·
vnde ſv́nden lere·
do vō dinem geiſte enbꝛan·
ir lib wunneb̾e·
Si vil ſvͤſſú mvͤſſe gar·
vns vō hǒbet ſv́ndē loͤſen·
ir lop blvͤmē vn̄ roͤſen·
ſolten alle zvngen·
Jr lip truter· luter· var·
trůc dich her alſo zeherzen·
dc nie vō dekeinem ſmerzen·
wart ir lib betwungē·
Hilf vns allen· wallen dar·
da mit richer engel doͤnen[WS 8]·
w̾de ein ewig pꝛis der ſchoͤnen[WS 9]·
ſvnder zil geſvngen·
Tv̊ vō ſwachen· ſachen· bar[WS 10]·
vnſ vil armē vf der erden·
laz[WS 11] vō dinē huldē w̾dē·
niemer vns v̾dꝛvngen· am̄·