Es ſint guͤtú núwe mere

Es ſint guͤtú núwe mere·
dc die vogel offenbere·
ſingent da man die blůmen ſiet·
ze den ziten in dem iære·
ſtvͤnde wol daſ mā vꝛo were·
leider des enbin ich niet·
min tvmbes herze mich verriet·
dc mv̊ſ vnſanfte vn̄ ſwere·
tragen dc leit das mir beſchiet·

Dú ſchoͤnſte vn̄ dú beſte frǒwe·
zwiſchē dem rotten vn̄ der ſǒwe·
gab mir blideſchaft hie bevoꝛn·
das iſt mir komen al ze rǒwe·
von tvmbheit vn̄ von trǒwe·
das ich ir hvlde han verloꝛn·
die ich ze der beſten hat erkoꝛn·
oder in der welte ieman ſchǒwe·
noch ſere fúrht ich ir zoꝛn·

Alzehohe minne·
bꝛâhten mich vſ dem ſinne·
do ich ir ǒgen vn̄ mvnt·
ſach wol ſten vn̄ ir kinne·
do wart mir das herze en binne·
von ſuͤſſer tvmbheit wnt·
dc mir wiſheit wart vnkvnt·
des bin ich wol woꝛden inne·
mit ſchaden ſit ze maniger ſtvnt·

Das úbel woꝛt ſi verwâten·
das ich nie kvnde verlâten·
do mich betrǒg min tvmber wan·
der ich was gerende vſ der mâten·
ich bat ſi in der caritaten·
das ſi mich mvͤs al vmbe van·
ſo vil het ich niht getan·
dc ſi ein weninc vſ ſtraten·
dvr mich zevnrehte wolte ſtan·