Hauptmenü öffnen

Doctor Brants Narrenschiff/Von unnützem Jagen

< Doctor Brants Narrenschiff
« Vom Geistlichwerden Sebastian Brant
Doctor Brants Narrenschiff
Von schlechten Schützen »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[98v]

Mancher vil kost vff jagen leyt
Das jm doch wenig nutz vß dreyt
Wie wol er dick eyn weydspruch seyt


Narrenschiff (Brant) 1499 pic 0074.jpg

Von vnnutzem jagen


Jagen ist ouch on narrheyt nit
Vil zyt vertribt man on nutz mit
Wie wol es syn sol eyn kurtz wil
So darff es dannahat kostens vil

[99r]

5
Dann leydthund / wind / rüden / vnd bracken

On kosten füllen nit jr backen /
Des glich hund / vogel / vaederspil
Bringt als keyn nutz / vnd kostet vil
Keyn hasen / raephuon / vohet man

10
Es stat ein pfundt den jaeger an

Dar zuo darff man vil herter zyt
Wie man jm noch louff / gang / vnd rytt
Vnd suocht all berg / tal / weld / vnd heck
Do man verhag / wart vnd versteck /

15
Mancher verscheycht me dann er jagt

Das schafft er / hat nit recht gehagt /
Der ander voht eyn hasen offt
Den er hat vff dem kormarckt koufft
Mancher der will gar freüdig syn

20
Wogt sich an loewen / beren schwyn

Oder stygt sunst den gaempsen noch
Dem würt der lon zuo letsten doch /
Die buren jagen jn dem schne
Der adel hat keyn vorteil me

25
Wann er dem wiltpraet lang nach laufft

So hats der buwr / heymlich verkoufft /
Nembroht zuom erst fing jagen an
Dann er von gott gantz was verlan /
Esau der jagt vmb das er was

30
Eyn sünder / vnd der gotts vergaß

Wenig jaeger als Humpertus
Fyndt man yetz / vnd Eustachius
Die liessen doch den jaeger stodt
Sust truwten sie nit dienen gott