Doctor Brants Narrenschiff/Von Spottvögeln

« Nicht auf alle Rede achten Sebastian Brant
Doctor Brants Narrenschiff
Verachtung ewiger Freude »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[52v]

Es ist der narren guot enberen
Sie allzyt mit steyn werffen gern
Vnd wend keyn straff vnd wyßheyt lern



Von spott vogelen.


Ir narren / wellen von mir leren
Anfang der wyßheyt / vorht des herren
All kunst der heilgen ist gespreit
In den weg / der fürsichtikeyt

[53r]

5
Von wißheyt würt der mensch geert

Von jr all tag / vnd jor gemert
Eyn wyser ist nütz der gemeyn
Eyn narr syn kolben dreitt alleyn
Vnd mag vor wyßheyt hoeren nitt

10
Er spot der wysen zuo aller zyt

Wer eyn spott vogel leren will
Der macht jm selbst gespoettes vil
Wer strofft eyn boßhafftigen man
Der henckt jm selbst eyn spaetlin an

15
Eyn wisen stroff / der hoert dich gern

Vnd yllt / von dir me wyßheyt leren
Wer eyn gerechten stroffen duot
Der hat von jm syn stroff für guot
Der vngerecht geschaendet vil

20
Vnd würt doch selbst geschaent bywil

Der haeher eyn spotvogel ist
Vnd ist doch vil / das jm gebrist
Wann man eyn spoetter würfft für thür
So kumbt mit jm / all spott hyn für

25
Vnd was er zanck vnd speywort tribt

Das selb dann vor der tueren blibt
Hett Dauid nit syn selbs geschont
Nabal wer syns gespoets gelont /
Sannabalach syn spottes ruwt

30
Do man die mur Hierusalem buwt

Die kynd wurdent von Beren gdoet
Die glatzet schulten den prophet
Semey hat noch gar vil suen
Die gern mit steynen werffen tuen