Hauptmenü öffnen

Wikisource β

Doctor Brants Narrenschiff/Sich an Narren stossen

< Doctor Brants Narrenschiff
« Von offenkundigen Anschlägen Sebastian Brant
Doctor Brants Narrenschiff
Nicht auf alle Rede achten »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[50v]

Wer sicht eyn narren fallen hart
Vnd er sich darnoch nit bewart
Der gryfft eym narren an den bart


Narrenschiff (Brant) 1499 pic 0041.jpg

An narren sich stossen


Man sicht taeglich der narren fal
Vnd spottet man jr vberal
Vnd synt verachtet by den wysen
Die doch jnn narren kapp sich brysen

[51r]

5
Vnd schilt eyn narr den andern narren

Der doch vff synen weg duot karrhen
Vnd stoßt sich do zuo aller frist
Do vor der narr gefallen ist
Hyppomenes sach manchen gouch

10
Vor jm enthoubten / doch wolt er ouch

Sich wogen / vnd syn leben gantz
Des wer nah gsyn vnglück syn schantz
Eyn blind den andern schilttet blyndt
Wie wol sie beyd gefallen synt

15
Eyn krebs den andern schaltt / vmb das

Er hynder sich gegangen was
Vnd ging jr keyner für sich doch
Dann eyner ging dem andern noch
Eym stieffvatter volgt dick vnd vil

20
Wer nit sym vatter volgen wil

Hett Phaeton syn faren gelon
Vnd Icarus gemaecher geton
Vnd beid gefolgt jrs vatters rott
Sie weren nit jn der jugent dot

25
Welcher den weg Hyeroboam

Gyng / keyner ye zuo gnaden kam
Vnd sahen doch / das plag vnd roch
Gyng staets on vnderloß dar noch
Wer sicht eyn narren fallen hart

30
Der luog / das er syn selbs wol wart

Dann das ist nit eyn doreht man
Wer sich an narren stossen kan
Der fuchs wolt nit jnn berg / vmb das
Nye keyner wyder kumen was /