Doctor Brants Narrenschiff/Keinen Scherz verstehen

« Kein Narr sein wollen Sebastian Brant
Doctor Brants Narrenschiff
Böses thun und nicht erwarten »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[90v]

Wer kynd / vnd narren sich nymbt an
Der soll jr schimpf für guot ouch han
Er muoß sunst mit den narren gon


Narrenschiff (Brant) 1499 pic 0068.jpg

Schympf nit verston


Der ist eyn narr der nit verstoet
Wann er mit eynem narren redt
Der ist eyn narr der widerbilt
Vnd sich mit eynem truncknen schilt

[91r]

5
Mit kynd / vnd narren schympfen wil

Vnd nitt vff nemen narren spil
Wer wil mit jaegern gon der hetz
Wer keyglen will / der selb vff setz /
Der hül / der by den wolffen ist /

10
Der sprecht ich lieg / dem nütz gebrist

Wort gend vmb wort / ist narren wiß
Guots gaendt vmb boeß / hatt hohen priß
Wer gibt das boeß vmb guotes vß
Dem kumbt boeß / nyemer vß dem huß /

15
Wer lachet des eyn ander weynt

Dem kumbt des glich / so ers nit meynt
Eyn wiser gern byn wysen stat
Eyn narr mit narren gern vmb gat /
Das nyemans lyden mag eyn narr

20
Das kumbt vß synem hochmuot dar

Me leid geschicht eym narren dran
Das er sicht ettlich vor jm gan
Dann er hab früd / das jm sunst all
Noch gangen / vnd zuon fuessen fall /

25
Vnd das du merckest / wie ich es meyn

Eyn stoltzer wer gern herr alleyn /
Aman hatt nit so grossen glust
Das yederman jn anbett sust
Als er hatt leyd / das jn eyn man

30
Nitt bettet Mardocheus an /

Nitt nott das man narren vff merck
Man spuert ein narren an sym werck /
Wer wiß wolt syn (als yeder sol)
Der ging der narren muessig wol