Doctor Brants Narrenschiff/Kein Narr sein wollen

« Aller Länder Kunde	Sebastian Brant Doctor Brants Narrenschiff	Keinen Scherz verstehen »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Der narr Marsyas der verlor
Das man jm abzoch hut vnd hor
Hielt doch die sackpfiff / noch als vor

Nit wellen eyn narr syn

Die eygenschafft hat yeder narr
Das er nit kan genemen war
Das man syn spott / dar vmb verlor
Der narr Marsyas / hut vnd hor

5

Aber narrheyt ist so verblent

Ein narr zu^o allen zyten wa^ent
Er sy witzig / so man sin lach
Vnd ein juffta^eding vß jm mach
Stelt er sich ernstlich zu^o der sach /

10

Das man jn ouch für witzig halt

Biß jm die pfiff vß dem ermel falt /
Wer vil gu^ot hat / der hat vil fründ
Dem hilfft man redlich ouch zu^o sünd
Ein yeder lu^ogt wie er jn schynd

15

So lang das wert / biß er würt arm

So spricht er heu / das gott erbarm
Wie hatt ich vor / nochlouff so vil
Kein fründ ist / der mich tro^esten wil /
Hett ich das vor by zyt betracht

20

Ich wa^er noch rich / vnd nit veracht /

Ein groß torheit ist das für wor
Welcher verdu^ot jn eynem jor
Do er sin tag solt leben mitt
Das er das üppeklich vß gitt

25

Vnd meynt zitlich fir oben han

Das er mo^eg noch dem ba^ettel gan
So jm dann stosßt vnder sin hend
Armu^ot / verachtung / spott / ellend /
Vnd er zerrissen loufft / vnd bloß

30

So kumbt jm dann der ruwen stoß /

Wol dem / der jm fründ machen kan
Vß gu^ot / das er doch hye mu^oß lan
Die jn tro^esten vnd by jm ston /
So er ist allenthalb verlon

35

Dar gegen ist mancher narr vff erd

Der sich an nymbt na^erscher geberd
Vnd wann man jnn joch schünd vnd süt
So kund er doch gantz nütz dar mitt
Dann das er ettwan die oren schütt

40

Will na^errisch syn mit allem fliß

Doch nyemans gefeltt syn narren wiß /
Wie wol er glich eym narren du^ot
Nymbt doch sin schympff niemans für gu^ot
Ouch sprechen von jm ettlich gsellen

45

Der narr wolt sich gern na^errisch stellen

So kan er weder wiß noch gba^erd
Er ist ein narr vnd nyemans werd /
Vnd ist eyn seltzen ding vff erd
Mancher will syn eyn witzig man

50

Der sich nymbt der dorheyt an

Vnd meynt das man jn ru^emen sol
Wann man spricht / der kan narrheyt wol
Dar gegen sint vil narren ouch
Die vß gebru^otet hat eyn gouch

55

Die wellen von der wißheyt sagen

Es sy gehowen oder geschlagen
So went sie witzig syn gezelt
So man die doch für narren heltt /
Wann man eyn narren knützschet klein

60

Als man dem pfeffer du^ot jm steyn

Vnd stieß jn dar jnn joch lang jor
So blib er doch eyn narr als vor
Dann yedem narren das gebrist /
Das wonolff / btriegolffs bru^oder ist

65

Mancher der ließ sich halber schinden

Vnd jm alle viere mit seylen bynden
Das jm alleyn ging gelt dar vß
Vnd er vil golds hett jm sym huß
Der lytt ouch das er la^eg zu^o bett

70

Vnd er der richen siechtag hett

Vnd man jn wie eyn bu^oben schiltt
Echt er dar von hett zynß vnd gültt
Mit zymlich nyeman benu^egen will
Wer vil hat / der will han zu^o vil

75

Vß richtum übermu^ot entspringt

Richtum gar selten demu^ot bringt
Was soll eyn dreck wann er nit stinckt /
Vil sint alleyn / die hant keyn kynd
Keyn bru^eder noch sunst nohe fründ

80

Vnd ho^eren nit vff arbeyten doch

Ir ougen fült keyn richtum ouch
Noch gdencken nit / wem werck ich vor
Hab übelzyt ich gouch vnd tor
Gott gibt manchem richtum vnd ere

85

Vnd gebrist synr sel / nüt anders mere

Dann das jm gott nit dar zu^o gytt
Das er das bruch zu^o rechter zytt
Ouch das nit nyessen zymlich getar
Jo es eym fro^emden füller spar /

90

Tantalus sitzt jnn wassers lust /

Vnd hat an wasser doch gebrust
Wie wol er sicht die a^eppfel an
Hat er doch wenig freüd dar von
Das schafft / das er jm selbs nüt gan