Doctor Brants Narrenschiff/Entschuldigung des Dichters

« Von Fassnachtsnarren	Sebastian Brant Doctor Brants Narrenschiff	Der Weise »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Licht wer es / narren vohen an
Wann man ouch kündt von narrheyt lon
Welcher das schon wolt vnder stan
Der würd doch vil gehyndret dran

entschuldigung des dichters

Der ist eyn narr / vnd grosser dor
Der eym werckman den lon gibt vor
Der macht nit werschafft vff dem merckt
Wer nit vff künfftig blonung werckt /

5

Gar seltten würt verdient der lon

Der vor verzert ist / vnd verthon
Das werck gar langsam naher got
Das man macht vff vorgessen brott /
Dar vmb het man mir vorgelont

10

Das ich der narren hett geschont

Ich hett mich wenig dar an ko^ert
Dar zu^o wer es doch yetz verzo^ert /
Vnd hett die leng mich nit gewerdt
Als alles das do ist vff erd

15

Das ist vnnütz dorheyt geacht /

Wann ich ouch diß vmb gelt hett gemacht
Sorg ich mir würd nit glicher lon
Ich hetts worlich langs lossen ston /
Aber die wile ichs hab gethon

20

Durch gottes ere / vnd nutz der welt

So hab ich weder gunst noch geltt
Noch anders zytlich gesehen an
Des will ich gott zu^o zügen han
Vnd weiß doch / das ich nit mag bliben

25

Gantz vngestrofft jn mynem schriben

Den gu^oten will ichs lossen noch
Ir stroff / jnred / vff no^emen ouch
Dann ich mich des gen gott bezüg
Ist ettwas hie / dar an ich lüg

30

Oder das syg wider gotts lere

Der selen heil / vernunfft / vnd ere
Des stroff nym ich vff / mit gedult
Ich will am glouben nit han schuldt
Vnd bitten hye mit / yederman

35

Das man von mir für gu^ot well han

Vnd nit zu^o argem messen vß
Noch a^ergerniß / schand / nemen druß
Dann ich habs dar vmb nit gedicht
Aber ich weiß das mir geschicht

40

Glich wie der blu^omen die wol rücht

Dar vß das byenlin hunig zücht /
Aber wann dar vff kumbt eyn spynn
So su^ocht sie gyfft noch jrem gwynn
Das würt har jnn ouch nit gespart

45

Eyn yedes du^ot noch syner art

Wo nüt ist gu^otes jn eym huß
Do kan man nüt gu^ots tragen vß
Wer nit gern ho^ert von wißheyt sagen
Der würt dest dicker von mir klagen

50

Dem ho^ert man an syn worten an

Was er sy für eyn gouckelman /
Ich hab gesehen manchen dor
Der vff erhebt was hoch entbor
Glich als der Ca^eder Lybani

55

Der bducht sich syner narrheyt fry

Ich wart eyn wile / vnd hort syn nym
Ich su^ocht jn / er gab mir keyn stym
Man kund ouch fynden nit die stat
Do der selb narr gewonet hat

60

Wer oren hab / der mo^erck / vnd ho^er

Ich schwig / der wolff ist mir nit verr
Eyn narr strofft manchen vor der zyt
Das er nit weißt was jm an lyt
Mu^est yeder syn des andern ruck

65

Er würt bald jnnen was jn druckt

Wer wel / der leß diß narrenbu^och
Ich weiß wol / wo mich druckt der schu^och
Dar vmb / ob man wolt scheltten mich
Vnd sprechen / artzt heyl selber dich

70

Da^enn du ouch bist jnn vnser rott

Ich kenn das / vnd vergych es gott
Das ich vil dorheyt hab gethon
Vnd noch jm narren orden gon
Wie vast ich an der kappen schütt

75

Will sie mich doch gantz lossen nytt

Doch han ich fliß / vnd ernst an ko^ert
Do mit (als du sichst) han gelert
Das ich yetz kenn / der narren vil
Hab mu^ot ouch fürter / ob gott will

80

Mit witz mich bessern / mit der zyt

Ob mir so vil / gott gnaden gytt
Eyn yeder lu^og das er nit fa^el
Das jm nit blib der narren stra^el
Der kolb veraltt jn syner hant

85

Des sy eyn yeder narr gemant

Als bschlüßt Sebastianus Brant
Der yedem zu^o der wißheyt ratt
Er sy was wesens / oder stat
Keyn gu^ot werckman / kam nye zu^o spatt

·1·4·9·9·

Nüt on vrsach.

·J·B·