Doctor Brants Narrenschiff/Böses Beispiel der Eltern

« Ein Gesellenschiff Sebastian Brant
Doctor Brants Narrenschiff
Von Wollust »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[62v]

Do werdent kynd den eltern glych
Wo man vor jnn nit schamet sich
Vnd krueg vor jnn / vnd haefen bricht



Bosz exempel der eltern.


Wer vor frowen vnd kynder wil
Von buolschafft / boßheyt / reden vil
Der wart / das von jnn widerfar
Des glich / er vor jn triben tar

[63r]

5
Keyn zuocht / noch ere / ist me vff erd

Kynd / frowen / leren wort vnd gberd
Die frowen das von mannen hand
Die kynd von eltern nement schand
Vnd wenn der appt die würfel leydt

10
So sint die münch zuom spiel bereit

Die welt ist yetz voll boeser lere
Man findt leyder keyn zuocht / noch ere
Die vaetter sint schuldig dar an
Die frow die lert von jrem man

15
Der suon / des vatters halttet sich

Die dochter ist der muotter glich
Dar vmb zuo wundern nyemans yl
Ob jnn der welt sint narren vil
Der krebs glich wie syn vatter trytt

20
Es macht keyn wolff / keyn lemblin nytt

Brutus / vnd Chato sint beyd dott
Des mert sich Cathelinen rott /
Wis / syttlich vaetter / tugentrich
Machen ouch kynder jren glych

25
Diogenes eyn jungen sach

Der druncken was / zuo dem er sprach
Myn suon / das ist dins vatter stadt
Eyn drunckner dich geboren hat
Es darff das man gar eben luog

30
Was man vor kynden red vnd tueg

Dann gwonheyt / andere natur ist /
Die macht / das kynden vil gebrist
Eyn yedes leb recht / jnn sym huß
Das aergerniß nit kumm dar vß