Doctor Brants Narrenschiff/(Vom Endechrist)

« Von Falschheit und Betrug Sebastian Brant
Doctor Brants Narrenschiff
Wahrheit verschweigen »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[141r]

[141v]

Sidt ich den fürloß han gethon
Von denen die mit falsch vmbgon
So fynd ich noch die rechten knaben
Die by dem narren schiff vmb traben

5
Wie sie sich / vnd sunst vil betriegen

Die heilig gschrifft krümmen / vnd byegen
Die gent dem glouben erst eyn büff
Vnd netzen das bapyren schyff
Eyn yeder ettwas risßt dar ab

10
Das es dest mynder bort me hab

Ruoder / vnd ryemen nymbt dar von
Das es dest ee moeg vndergon /
Vil sint jn jrem synn so kluog
Die dunckent sich syn witzig gnuog

15
Das sye vß eygner vernunfft jnfall

Die heilig gschrifft vß legen all /
Dar an sie faelen doch gar offt
Vnd würt jr falsche ler gestrofft
Dann sie vß andern gschrifften wol

20
(Der allenthalb die welt ist vol)

Moechten sunst vnder richten sich
Wann sie nit woltten sunderlich
Gesehen syn / für ander lüt
Do mit verfart das schiff zuo zyt /

25
Die selben man wol druncken nennt

Das sie die worheyt hant erkennt
Vnd doch das selb vmbkeren gantz
Do mit man saeh jrn schyn / vnd glantz /
Das sint falscher propheten ler

30
Vor den sich hueten heißt / der herr

[142r]

Die anders die gschrifft vmb keren
Dan sie der heilig geist selb duot leren
Die hand eyn falsch wog jnn der hend
Vnd legen druff / als das sie wendt

35
Machent eyns schwaer / das ander lycht

Do mit der gloub yetz vast hyn zücht
Inn mitt wir der verkerten ston /
Jetz regt sich vast der scorpion
Durch solch anreytzer / von denen hett

40
Geseyt Ezechiel der prophet

Die übertraetter des gsatz
Die suochen dem endkrist syn schatz
Das er hab ettwas vil entvor /
Wann schyer verlouffen sint syn jor

45
Vnd er vil hab / die by jm ston

Vnd mitt jm jnn syn falscheyt gon /
Der würt er han vil jnn der welt
Wann er vß teylen würt syn gelt
Vnd all syn schaetz würt fürhar bringen

50
Darff er nit vil mit streichen zwyngen

Das merteyl würt selbs zuo jm louffen
Durch gelt würt er vil zuo jm kouffen
Die helffen jm das er dann mag
Die guoten bringen alle tag /

55
Doch werden sie die leng nit faren

Inn würt bald brechen schiff / vnd karren
Wie wol sie faren vmb vnd vmb
Vnd würt die worheyt machen krumb
So würt zuo letst doch worheyt bliben

60
Vnd würt jr falscheyt gantz vertriben

[142v]

Die yetz vmbfert jnn allem standt
Ich voercht das schiff kum nym zuo landt
Sant Peters schifflin ist jm schwangk
Ich sorg gar vast den vndergangk

65
Die waellen schlagen all sytt dran

Es würt vil sturm vnd plagen han
Gar wenig worheyt man yetz hoert
Die heilig gschryfft würt vast verkoert
Vnd ander vil yetz vß geleyt

70
Dann sie der munt der worheit seyt

Verzych mir recht waen ich hie triff
Der end kryst sytzt jm grossen schiff
Vnd hat syn botschafft vß gesandt
Falscheyt verkünt er / durch all landt

75
Falsch glouben / vnd vil falscher ler

Wachsen von tag zuo tag ye mer
Dar zuo / duent drucker yetz guot stür
Wann man vil buocher würff jnns für
Man brant vil vnrecht falsch dar jnn

80
Vil trachten alleyn vff gewynn

Von aller red sie buecher suochen
Der correctur sie wenig ruochen
Vff groß bschisß vil yetz studieren
Vil drucken / wenig corrigyeren

85
Sie luogen übel zuo den sachen

So sie mennlin / vmb mennlin machen
Sie duont jnn selber schad / vnd schand
Mancher der druckt sich vß dem land /
Die mag das schiff dann nit getragen

90
Sie muessen an den narren wagen

Das eyner tueg den andern jagen

[143r]

Die zyt die kumbt / es kumbt die zyt
Ich voercht der endkryst sy nit wyt
Das man das merck / so naem man war

95
Vff dry ding / vnser gloub stat gar

Vff apploß / buecher / vnd der ler /
Der man yetz gantz keyns achtet mer /
Die wile der gschrifft / spuert man do by
Wer merckt die vile der truckery

100
All buecher synt yetz fürher bracht

Die vnser elttern ye hant gmacht
Der sint so vil yetz an der zal
Das sie nütz geltten vberal
Vnd man jr schyer nüt achtet mer /

105
Des glichen ist es mit der ler /

So vil der schuolen man nye fand
Als man yetz hat jn allem land /
Es ist schyer nyenan statt vff erd
Do nit eyn hohe schuol ouch werd

110
Do werden ouch vil gelerter lütt

Der man doch yetz gantz achtet nütt
Die kunst verachtet yederman
Vnd sicht sie über die achseln an
Die gelerten muessen sich schyer schammen

115
Ir ler / vnd kleyt / vnd jrs namen

Man zücht die buren yetz har für
Die gelerten muessen hynder die thuer
Man spricht schow / vmb den schluderaffen
Der tüfel beschißt vnß wol mit pfaffen

120
Das ist eyn zeychen / das die kunst

Keyn ere me hat / keyn lieb / noch gunst

[143v]

Do mit würt ab gon bald die ler
Dann kunst gespyset würt durch er /
Vnd wann man jr keyn ere duot an

125
So werden wenig dar noch stan /

Der abbloß ist so gantz vnwaert
Das nyeman dar noch frogt noch gaert
Nyeman will me den abbloß suochen
Jo mancher wolt jn jm nit fluochen

130
Mancher geb nit eyn pfenning vß

So jm der abbloß kumbt zuo huß
Vnd würt jm dar zuo kumen doch
Er reycht jnn verrer dann zuo Ach /
Dar vmb es vnß glich also gat

135
Als denen / mit dem hymelbrot

Die woren des so gar vrtrütz
Sie sprochen es wer jnn vnnütz
Ir sel / vnwillen dar ab hett
Vnd machten dar vß eyn gespoett /

140
Als duot man mit dem abbloß ouch

Der würt veracht / durch manchen gouch /
Dar vß nym ich mir eyn bericht
Jetz stünd der gloub glich wie eyn liecht
Wann das will gantz verfaren hyn

145
So gibt es erst eyn glantz / vnd schyn /

Das ich es frylich sagen mag
Es nah sich vast / dem jungsten tag
Sidt man das lyecht der gnad veracht
So würt es bald gantz werden nacht

150
Des glichen vor nye würt gehoert

Das schiff den boden vast vmb koert