Disú liet dú heissent frowwen tanz

Disú liet dú heissent frowwen tanz·
dú sol nieman singen er si fro·
swer mit zúhten treit der froͤiden kranz·
vnd dem sin mv̊t stat von wiben ho·
dem erlǒbe ichs zesingen wol·
blideklichen man si tanzen sol·

Trvren ist zwar nieman gůt·
wan dem einen der sin sv́nde klagt·
hohen lop erwirbet hoher mv̊t·
gv̊ten wiben er wol behagt·
da von wil ich iemer mere sin
hohgemv̊t dur dich gv̊t frowe min·

Froͤide git mir din wol redente mvnt·
hohen mv̊t din reine senfte git·
froͤiden tou^{[WS 1]} mir vs des herzen grunt·
kvnt von dir in ellú mine lit·
got hat sinen flis an dich gelit·
da von din lip der eren krone treit·

Liehtiv^{[WS 2]} ǒgen da bi brvne bra·
hast dv vnd zwei roͤtú wengelin·
schoͤn bist dv hie vnd da·
brvn rot wis der drier^{[WS 3]} varwe schin·
treit din hohgeborne schoner lip·
tugende hastu gůt wiblich wib·

Das dv als mange tugende hast·
da von bin ich alles trurens fri·
so dv also schone vor mir gast·
so ist mir als ich in dem himel si·
got so schonen engel nie gewan·
den ich fúr dich wolte sehen an·

Anmerkungen (Wikisource)

1. Vorlage: tv̊.
2. Vorlage: Liehte.
3. Vorlage: dꝛie.