Diſú liet dú heiſſent frowwē tanz
[244v]
Diſú liet dú heiſſent frowwē tanz·
dú ſol nieman ſingē er ſi fro·
ſwer mit zúhtē treit der froͤidē kranz·
vn̄ dē ſin mv̊t ſtat vō wibē ho·
dē erlǒbe ichſ zeſingē wol·
blideklichē man ſi tanzē ſol·
Trvren iſt zwar nieman gůt·
wan dem einen der ſin ſv́nde klagt·
hohē lop erwirbet hoher mv̊t·
gv̊tē wibē er wol behagt·
da vō wil ich iem̾ mere ſin
hohgemv̊t dur dich gv̊t frowe min·
Froͤide git mir din wol redente mv̄t·
hohē mv̊t din reine ſenfte git·
froͤiden tou[WS 1] mir vs des h̾zen grunt·
kvnt vō dir in ellú mine lit·
got hat ſinē flis an dich gelit·
da vō din lip der erē krone treit·
Liehtiv[WS 2] ǒgen da bi bꝛvne bꝛa·
haſt dv vn̄ zwei roͤtú wengelin·
ſchoͤn biſt dv hie vn̄ da·
bꝛvn rot wiſ d̾ dꝛier[WS 3] varwe ſchin·
treit din hohgeboꝛne ſchoner [245r] lip·
tugēde haſtu gůt wiblich wib·
Das dv als mange tugende haſt·
da vō bin ich alles trurens fri·
ſo dv alſo ſchone voꝛ mir gaſt·
ſo iſt mir als ich in dem himel ſi·
got ſo ſchonē engel nie gewan·
den ich fúr dich wolte ſehē an·