Die Schedelsche Weltchronik (deutsch):251

 

250 <<<Vorheriges Blatt	Die Schedelsche Weltchronik    Blatt CCLI	Nächstes Blatt>>> 252
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CCL verso:

Das sechst alter

Linea der bebst // Pius der ander

Jar der werlt .vi^m.vi^c.lvii.          Jar Cristi .i^m.iiii^c.lviii.^[1]

Pius der ander^[2] dauor Eneas picolhomineus genant ein Walh von Senis. nach dem vater vormals Siluius zugenambt ist in disem iar am .xx. tag des monats Augusti mit gemayner wale aller cardinel zu babst erkorn. ein man alles lobs wirdig. redper. wolgesprechig vnd sunderlicher klu^ogheit vnd werltgescheydigkeit. der nicht zu der mu^eeßigkeit sunder zu handlung großer ding gefordert wardt dann erstlich hat er die grammaticam. darnach die poetrey vnnd nachfolgennd die kunst des zierredens gelernet vnd dieselben also synnreichlichen begriffen das er in ku^ertze vil lateinischer scho^ener getichte machet. Zu letst ergabe er sich auf die lernung der werltlichen kaiserlichen recht. Darnach kome er erstlich mit Dominico capranicio.^[3] vnd nachfolgend mit Bartholomeo dem Nouariensischen bischof. vnd nach ime mit Nicolas dem cardinal des heilligen creu^etzs gein Basel. vnd wardt alweg bey allermenigclichem in eren gehalten. In demselben concili was er ein schreiber vnd ein rechtfertiger der bebstlichen brieff. vnd tet darinn vil rede. vnd wardt von des concili wegen offt in botschafften gepraucht. vnd zu letst zu Friderichen dem ro^emischen ko^enig^[4] von babst Felice^[5] gesendt. bey dem er dann sein befolhne werbung also synnschicklich handlet das ine der ko^enig mit einer poeten kron begabet vnd zu eynem prothonotari. vnnd darnach zu einem ratgeben auffname vnnd seins rats in schweren tapffern sachen pflage. Darnach als babst Nicoulas erkorn wardt^[6] vnd der bischoff zu Triest starb do wardt diser Eneas vnwissende von dem babst vnd ro^emischen ko^enig zu demselben bistthumb gefu^erdert. vnd darnach von babst Calixto^[7] in die zal der cardinel genomen. vnd zu letst nach absterben Calixti babst erwelet. Nach empfengknus der bebstlichen kron hat er sich gantzen zu versorgknus gemayns cristenlichs stands gekeret. vnd hertzog Sigmunden zu o^esterreich^[8] von handlung wegen wider einen cardinal geu^ebt schwerlich verpannet. Die ertzbischofe zu Mayntz vnd zu Beneuentan abgesetzt. vnd weder ko^enigen noch vo^elckern auß forcht oder geitzigkeit ichtzit verlihen. Katherinam von Senis in die zal der heilligen iunckfrawen Cristi geschriben. die fu^ergenomen satzungen in Franckreich abgestelt. ettliche ertzgru^oben bey Tolpham angerichtet. Zwischen dem ko^enig Ferdinandum vnd Sigismundum malatestam einen anstall gemacht. darumb das man dest sichrer gein Mantua (daselbsthin er ein gemaine versammlung der cristen fu^ergenomen het) komen mo^echt. also zohe diser Pius mytten in dem wintter von Rom auß vnd kome gein Mantua. Daselbst ward in versamlung vil fu^eersten vnd sendbotten mit gemaynem beschlu^oß ein heerzug wider die Tu^ercken angeschlagen. Diser babst hat nicht allain zu Rom sunder auch zu Senis vil scho^ener namhaftiger gepew auffgerichtet. Er was ein mensch gar messigs lebens. vnmu^eessiger zeit. kurtzer person. vor vnd ee der iar grolo^ecket. altgestalts antlitzs. in dem angesyht ein ernstlichkeit mit leichtlichkeit gemassigt erzaigende. in zierlichkeit des leibs mittelmassig von natur starcks leibs. den doch die lange wallunge vnd stettige arbait vermu^eedeten zusambt der husten. stayn vnd podagra damit er offt gepeynigt wardt. Er machet .xii. cardinel in seinem babstthumb. Zu letst starb er zu Ancona am fieber. im sechsten iar seins babstthumbs vnd wardt sein leichnam gen rom gefu^eert vnd daselbst in sant Peters kirchen bestattet.

Paulus der ander

Jar der werlt .vi^m.vi^c.lxiii.          Jar Cristi i^m.iiii^c.lxiiii.^[9]

Paulus der ander^[10] ein Venediger vormals Petrus barbo genant des babsts Eugenii schwester sun ein cardinal sancti marci ward in disem iar am letsten tag des monats Augusti babst erkorn ein großer herrlicher vnd ku^enmu^eetiger man[.] Dieweil er iung was do name er ime fu^er kawffmanschaft zetreiben. die dann zu venedig in achtperkeit ist. also wardt ime verku^endet wie seiner mu^oter bruder Gabriel zu babst erwelt vnd Eugenius genant worden^[11] wer do verzohe er auß vermanung seins bruders Pauli barbi. vnd begabe sich (wiewol yetzo gewachßner) auslernung der schrift. darnach ward er von seiner mu^oter bruder Eugenio von einem stand in den andern vnd zu iungst zu eim cardinal gefu^erdert. Er was von natur ein gu^eetig vnd holdselig man vnd ward also nach absterben Pii an sein stat genomen. Er was zu versammlung des gelts also geflißen das er schier alweg die pfru^end vnd bistthumb den ihenen befalhe die ein fayls ambt hetten dauon ein gabe entsteen mo^echt. Aber solch gelt geprauchet er auch zu zeiten zu miltigkeit. dann er halffe gar gern den armen cardineln. bischoffen. du^erftigen edellewten. iunckfrawen. wittiben. vnnd krancken. So verfu^eget er auch das das getrayd vnd andere zu der narung geho^erende ding zu Rom baßfayler dann vor gefunden warden. Er richtet zu Rom vil scheinperer vnd herrlicher gepew auff vnd wardt auch fu^er einen gerechten vnd mylten vnd stoltzen vnd schwern man geachtet. der dann die geregelten chorherren die auß

CCLI recto:

der werlt

Blat CCLI

sant Johanns laterano vertriben warden wider eingesetzet. Als diser Paulus ko^enigs Georgen trewlosigkeit erkennet do raytzet er die teu^etschen vnd die Hungern wider ine. Diser Paulus hat mit babstlichem wesen vnnd geprengk seine vorfaren vbertroffen. vnd zu seinem babsthu^ot vil ko^estlichkeit an edelm gestayn vnd perlein erzeu^egt. vnd in seiner babstlichen wirdigkeit .x. cardinel gemacht. Als er ime fu^ergenomen het lang zeleben do starb er im iar vnßers hayls .M.cccc.lxxi.^[12] in dem monat Julio in der andern stund der nacht als er desselben tags fro^elich ein versammlung vnd frewdenreichlich das nachtmal genomen het am schlag in dem sybenden iar seins babstthumbs. Er het grossen lust pfeben oder milawn. krebs. gefu^elte ku^echlein vnd visch zeessen dauor ime (als man maynet) der schlag ko^eme. dann als er in der nacht starb do het er in dem tag dauor zwen große milawn geessen[.] Dess tags darnach wardt sein leichnam in sant Peters mu^enster fru^ee begraben. vnnd der babstlich stu^ol feyret deßmals newn tag.

Antoninus ertzbischoff zu Florentz

Antoninus ein ertzbischoff zu Florentz^[13] ein vater prediger ordens ettwen ein verho^erer der rechtlichen sachen vnd hendel zu Rom ein man heilligs lebens vnd gu^oter sytten vnd der heilligen schriften zumal hohgelert ist diser zeit von seiner schriftlichen weißheit wegen bey den walhen in großem preyss. ru^om. lob vnd achperkeit gewesen: der dann seinen nachkomen gelassen hat vil vnd grosse bu^eecher mit großer arbait vnd langer erklerung erzeu^egt. vnder denen ist ein scho^ene treffenliche summa die fell des gewissens beru^erende den briestern dienstlich vnd nottu^erftig. Er hat auch vil gschihtbu^eecher zu vnderrichtung der to^edlichen gesammelt. Zu letst starb er nach der gepurt Cristi .M.cccc.lix. iar.^[14] in dem monat des mayen nit on großen wone der heilligkeit an vil wunderwercken scheinnende. vnd sein leichnam ward auß der bischoflichen behawßung in sant Marxen closter seins ordens mit grosser erwirdigkeit getragen.

Borsius ferrariensis

Borsius marggraff vnd erster hertzog zu Ferraria^[15] Leonelli des marggrafen bru^oder vnd Nicolai estensis sun hat nach absterben Leonelli seins bruders dz Ferrariensisch marggrafthumb eingenomen vnd .xxii. iar geherrscht. dann er wz ein man gu^oter synnschicklichkeit. keiner arglistigkeit noch betrieglicher scheinlichkeit. seine wort waren vol weyßheit vnd seine werck tapffer vnd herrlich[.] Als kaiser Friderich zu disem Borsio kome vnd diss menschen herrlichkeit vnd großmu^eetigkeit sahe do machet er ine (als hieuor gemeldt ist) der stett Murine vnd Regii zu einem hertzogen darzu auch diser Borsius vber vil iar von babst Paulo bestettigt wardt. Als aber Nicolaus sein vater dise vnd andere su^en auß zuweybern geporn het vnd alt worden was do gepare er auß einer eelichen frawen zwen andere su^en. nemlich Herculem vnd Sigismundum. die ließe er nach ime erben der herrschaft vnder der pflegnus vnd vormundschaft Leonelli seins bruders. der dieselben gein Neapolis verschicket vnd alle herrschaft besaße. vnd allain einen sun Nicolaus genant het. Vnlang nach desselben gepurt starb sein vater. vnd nach dem der sun Nicolaus nochmals zu der regirung vngeschickt was do gelanget die herrschung an disen Borsium mit dem geding das nach seim absterben die herrschaft an Nicolaum gelangen solt. Als nw Borsius in das fu^erstenthumb kome do forderet er Herculem vnd Sigismundum wider anhayms vnnd liebet sie vnnd auch Nicolaum als sein su^ene. Diser Borsius was go^etlicher vnd menschlicher schrift hohgelert vnnd ein liebhaber gelerter mann. vnd pawet ein weitberu^embs cartheu^eser closter von grund auff. vnnd starb im .xxii. iar seiner herrschung.

Ferdinandus

Ferdinandus des namens der ander^[16] des ko^enigs Alphonsi sun auß eim zuweib hat diser zeit nach absterben seins vaters in kraft desselben seins vaters geschefts vnd testaments das Neapolitanisch ko^enigreich erblich erobert. Aber nach dem der ko^enig Alphonsus on eelichen leiplichen mans erben abgieng vnd dasselb ko^enigreich deßhalb als ein lehen dem ro^emischen babstlichen stu^ol haym gefallen geachtet ward so vnderstu^onnd sich babst Calixtus dasselb mit waffen zeerfordern. aber Calixtus starb vnder denselben lewfften. vnd Ferdinandus erlanget nachfolgend daru^eber bestettigung von babst Pio wider der Gallier willen. Nach fridsamer erobrunng vnd besitzung des ko^enigreichs hat er vil feynd darnach in krieg ernydergelegt vnd mit hilff vnd fu^erderung des babsts Johannem den Andegauiensischen hertzogen den sun Renati auß apulia veriagt. vnd nach absterben babsts Pii mit Paulo vnnd andern seinen nachkomen feintschaft gehabt vnd sich mit den venedigern von des ko^enigreichs zu Cipern wegen bekrieget. vnd (als man sagt) die Tu^ercken wider die Venediger erweckt. Dem nach befrideten sich die Venediger mit den Tu^ercken vnd kereten sich mit heereßkraft gegen disem Ferdinandum vnd drungen ime Hydruntum^[17] die welschen meer statt ab.

Anmerkungen von Wikisource-Bearbeitern

1. 6657. Jahr der Welt, 1458 n. Chr.
2. Pius II. (bürgerlich Enea Silvio de' Piccolomini, 1405–1464) war von 1458 bis 1464 Papst.
3. Domenico Capranica (1400–1458) war ein Humanist und Kardinal der Römisch-Katholischen Kirche.
4. Friedrich III. (1415–1493) aus dem Hause Habsburg war ab 1440 römisch-deutscher König und ab 1452 Kaiser des Heiligen Römischen Reiches.
5. Felix V. (1383–1451), eigentlich Graf Amadeus VIII. „der Friedfertige“ von Savoyen, war 1439-1449 der letzte katholische Gegenpapst.
6. Nikolaus V., bürgerlich Tommaso Parentucelli (1397–1455), war Papst von 1447 bis 1455.
7. Kalixt III. (lat. Calixtus), eigentlich Alonso de Borja - italienisiert Alfonso Borgia (1378–1458), war 1455–1458 Papst.
8. Si(e)gmund oder Sigismund „der Münzreiche“ (1427–1496) war ab 1446 Herzog von Tirol und Vorderösterreich und wurde 1477 zum Erzherzog erhoben.
9. 6663. Jahr der Welt, 1464 n. Chr.
10. Paul II. (1417–1471), eigentlich Pietro Barbo, war 1464–1471 Papst.
11. Eugen IV. (1383–1447), eigentlich Gabriele Condulmaro, war 1431–1447 Papst.
12. 1471 n. Chr.
13. Antoninus von Florenz (1389–1459) war Dominikaner, ab 1446 Erzbischof von Florenz und wurde 1523 heiliggesprochen.
14. 1459 n. Chr.
15. Borso d’Este (1413–1471) war ein außerehelicher Sohn des Markgrafen Niccolò III. d’Este von Ferrara, Modena und Reggio und folgte seinem Halbbruder Leonello d’Este 1450 in den Besitzungen seines Vaters nach.
16. Ferdinand II. "Ferrantino" (1469–1496), König von Neapel und Erbe von Brienne
17. Otranto, Hafenstadt in Apulien