Die Schedelsche Weltchronik (deutsch):201

 

200 <<<Vorheriges Blatt	Die Schedelsche Weltchronik    Blatt CCI	Nächstes Blatt>>> 202
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CC verso:

Das sechst alter

Linea der bebst // Lucius der ander

LVcius wardt nach absterben Celestini zu babst erkorn. Er was von Bononia pu^ertig vnd dauor ein cardinal. der dann nach angenomnem babstthumb nichtz versawmet das zu notturft dess heerzugs gein iherusalen wider die hayden geho^eret. dann alßpald die iemerlich nyderlag vnd vnmenschlich grawsamkeit die die haiden (als hieuor gemelt ist) gegen den cristen in der statt edissa geu^ebt hetten heraußen lautprecht wardt do vnderstund sich Bernhardus der heillig vnnd hohgelert man des schutzs vnd schirms cristenlichs glawbens vnd vermanet alle cristlich fu^ersten schriftlich vnd mu^entlich das sie das panyer des heyligen creu^etzs wider die vnglawbigen annamen. aber dieweil der babst in diser handlung arbaytet do ward er durch die pestilentz hingenomen. imb .xij. monat seins babstthumbs.

Eugenius der dritt

Jar der werlt .vi^m.iij^c.xliij.               Jar cristi .j^m.j^c.xliiij.^[1]

EVgenius der drit von Pisis pu^ertig sant Anastasij abbt dauor zu eim mu^ench von Bernhardo dem heilligsten mann erwelt wardt nach absterben Lucij in sant Cesarij kirchen von den vetern in großer hoffnung zu seiner heilligkeit dann zu seiner werltlewftigkeit zu babst erkorn. wiewol er darnach nit mynder an werltlicher klu^ogheit dann an gu^otheit tu^eglich erschyne. Als er aber verstund dz ime die ro^emer widerwertig sein wolten do zohe er bey nach auß vnd kome in das closter Farsum daselbsthin beru^eeffet er auß rome zu ime die cardinel vnd hoflewt vnnd wardt geweyhet vnd bestettigt. Als er nw darnach nit allain der ro^emer bedroung. sunder auch ire vbung vnd thaten verschmehet do machten die ro^emer frid mit dem babst. Nw verstund er nachfolgend das die ro^emer in arglistiger maynung mit ime frid auffgenomen hetten. dem nach fiel er vber die tyber auß vnd wardt von den ro^emern mit waffen vnd geschoss verfolget vnnd kom hin in franckreich. daselbst funde er sant Bernhart von dem lernet er wie vbel der cristen sachen in asia stu^onde. do batten sie bede ko^enig Ludwigen zu franckreich das er das creu^etz an sich name vnd mit eim heerzug gein Jherusalem raysete. Darnach im iar des herren tausent hundert .lij. kom eugenius wider gein rom vnd bracht wider in seinen gewalt ettwieuil stett die die tyrannen darzwischen beku^emert hetten. Zu letst starb er imb .ix. iar seins babstthumbs.

Anastasius der vierdt

ANastasius der vierdt ein ro^emer dauor ein abbt vnd cardinal hat nach empfangnem babstthumb einen scho^enen ko^estlichen kelch sant Johanßen kirchen gegeben vnd kurtzer weil scho^ene hewßer bey marie rotunde gepawt. Er hett ime fu^ergenomen vil dings zu wirdigkeit vnd ere der kirchen vnd zu zierde der ro^emischen statt auffzerichten wo er gelebt solt haben. Es was diser zeit schier in gantzem Europa ein hunger vnd tewrung do raichet diser babst Anastasius heymlich vnd offenlich den armen du^erftigen menschen vil almu^osen. Er starb zu letst in dem ersten iar vierdten monat amb .xxiiij. tag seins babstthumbs vnnd wardt in sant Johanßen kirchen begraben.

Richardus von sant Victor

Richardus de sancto victore ein fu^ertreffenlicher hoh achtparer lerer vnd geregelter chorherr sancti victoris zu paris. ein scharpffer vnd vnzweyfellicher disputirer ist diser zeit zu Parys hohberu^embt gewesen. der dann zu dem das er ein heilliger man wz sunst auß seiner synnreichen ku^enstlichen weyßheit vil tappfferer lobwirdiger schriften vnd bu^echer den gelerten wolbekant gemacht hat.

Malachias bischoff

MAlachias in Hybernia erzogen. geleret vnnd von edeln mechtigen eltern geporn. wardt in der statt Ardinacha von eim Malachias genant der in einer zell der kirchen gott dienet. der weis eins rechten lebens vnderrichtet. vnnd darnach im .xxv. iar seins alters zu briester geweyhet vnd zu verwesung eins bischofs gesetzt. vnd darnach im .xxx. iar zu bischoff zu Conereht geweihet vnnd vnder dasselb vihisch volck gefu^eeret. die bracht er zu gar gu^otten sytten. Darnach wardt er zu eim ertzbischoff auffgenomen vnd in gantzem hybernia ein hawbtbischoff geordnet. vnd hat mit seiner lere vnnd wunderzaichen nit allain Hyberniam sunder auch scociam erleu^echtet. darnach starb er im iar des herren. tawsent hundert. xlviii.^[2]

CCI recto:

der werlt

Blat CCI

Linea der kaiser // Cunrat der dritt

CVnrat der dritt kaisers Heinrichs des fu^enften enicklein von gepurt ein schwab. wardt nach absterben Lotharii des kaisers zu Coblentz gemainlich von den churfu^ersten zu ro^emischem ko^enig in beywesen Theodorici eins babstlichen legaten erkorn. vnnd darnach von demselben legaten zu Ach mit ko^enigclicher kron bekro^enet. vnd regieret. xv. iar. Aber die sachsen vnd hertzog Heinrich zu bayern der hohfertig genant waren ime widerspennig. Darnach ward zu Babenberg ein fu^erstlicher tag gehalten. vnd daselbst der ko^enig gegen den sachßen. vnd des kaisers Lotharii wittiben zu frid vnd gnaden bewegt. Aber hertzog Heinrich zu bayern wer gern Ro^eischer ko^enig gewest vnd enthielte das kaiser heilligthumb vnnd zierde zu Nu^ermberg in der burg. doch wardt er zu letst das heillig creu^etz vnd das sper widerzegeben bedranngt. vnd auß erkantnus der fu^ersten vom ko^enig mit vier rittern in sachßen verschickt. daselbst starb er. Als nw diser ko^enig Cunrat allenthalben in teu^etschen landen frid gestellt het do name er auß vermanung sant Bernharts mitsambt Ludwigen zu franckreich. Alphonso zu Hyspania vnd Heinrichen zu engelland ko^enigen vnd vil andern fu^ersten wider die sarracen das creu^etz an sich. vnd zohe mit großer mechtiger heerßkraft gein Constantinopel zu. daselbst ward er von Emanuel dem kriechischen kaiser in betrieglicher weiß freu^entlich empfangen vnnd vberredet pald fu^er die statt Iconium zeziehen mit verhaissung alle dem heer notturftige ding zebestellen vnnd daselbsthin zeschicken. Vnd als nw dieselb wolbewaret vnd fest statt ettwielanng belegert wardt do kom ein großer seuchen vnnd sterben in das heer von dem prot mit kalck gemischt das inen die kriechen raichten. also das ko^enig Cunrat wider hindersich in Traciam weichen mu^oßt. vnd ko^enig Cunrat vnd ko^enig Ludwig schryben Balduino dem ko^enig zu Iherusalem hilff zu vnd entschlussen sich das heer fu^er die statt Damascum zefu^eren vnnd komen gein Iherusalem. daselbsthin was ein babstlicher legat ko^enig Ludwigen lang nach gerayset. Vnd als nw dise drey cristenliche ko^enig sich fu^er Damascum legeren wolten do namen sie auch den bebstlichen legaten mitsambt dem patriarchen zu Iherusalem vnd vil bischoff zu inen in den zug vnd heffteten das geleger mechtigclich fu^er die statt. die die knecht Abrahams gepawt haben. vnd die an eim felldigen von natur trucken. aber von arbait kunst vnd fleiß fruchtpern ende ligt. dann in derselben gegent ist ein klains wasserflu^oßlein darauß vil rynnen in die felder gelaytet werden vnd denselbigen erdpodem befeu^echtigen vnd fast fruchtper machen. daselbsthin hett sich das heer nidergelaßen also das man den burgern in der statt solche wesserung leichtlich weeren mocht. Aber auß rat eins assirischen mans (dem dann Balduinus vil vertrawet) rugkten die cristen mit irer wagenburg vnd geleger an ein anders ort do mochten die Damascener dem heer die wesserung weren. also kome hunger vnd durst in das heer das es auffbrache. vnd ko^enig Cunrat vnd Ludwig ir heer wider in Europam fu^eerten vnnd anhayms zohen. In mittler zeit wardt Rogerius vom babst zu ko^enig erho^eht. der raytzet Guelfonem des benanten Heinrichs bruder wider ko^enig Cunraten zu krieg. aber Guelfo wardt bey dem gschloß Winßberg ernidergelegt. Zu letst starb ko^enig Cunrat vnempfangen kaiserlicher bekro^enung zu babenberg im iar des herren tawsent hundert. liii.^[3]

VOn disem Guelfone haben die Guelfi (als ettlich maynen) iren namen. der dann als ein betru^eeber des frids in welschen landen vberhand genomen hat. Welche aber vnd auß was vrsachen ettlich Guelffi vnnd ettlich Gebellini gehaißen werden das wirdt hernach gemeldet.

Ko^enig Ludwig zu franckreich

LVdwig ko^enig zu franckreich ko^enig Ludwigs sun regiret. xlviii. iar. der was ein man groß gemu^eets vnd tugent. vnd zohe mit großer menig volcks im. xiiii. iar seins ko^enigreichs mitsambt dem ro^emischen ko^enig Cunraten wider die tu^ercken. Als er gein Iherusalem zunahnet da schicket ime der ro^eisch ko^enig den patriarchen daselbst entgegen. der wardt durch die statt vnd an erwirdege ende gefu^eeret. vnnd blibe nach dem abzug von Damasco schier ein gantz iar in dem ko^enigreich Iherusalem mitsambt seiner gemahel der ko^enigin. Zu lest zohe er mit den fu^ersten wider haym gein franckreich.

ZV disen zeiten komen die orientalischen gegent der Lateinischen von tag zu tag in abfal vnd bo^eserung. die doch daruor allain allen feynden des cristenlichen glawbens ein forcht vnnd erschrecken warn. aber sie komen in solche verachtung das sich die feind nichts mer vor inen besorgten. vnd die macht vnd stercke der cristen vernichteten. Auß dem enntsprunge das Noradinus der hayden die Antiochischen gegent sich vnderstund zebeku^emern vnd vnder sich zebringen.

---

1. 6343. Jahr der Welt, 1144 n. Chr.
2. 1148 n. Chr.
3. 1153 n. Chr.