Die Schedelsche Weltchronik (deutsch):188

 

187 <<<Vorheriges Blatt	Die Schedelsche Weltchronik    Blatt CLXXXVIII	Nächstes Blatt>>> 189
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CLXXXVII verso:

Das sechst alter

manlich erben starb. do wardt Cunrat des erschlagen Cunrats sun in das reich gesetzt. Als aber derselb Cunrat auch on erben abgieng do wardt Heinrich der demu^eetig gekro^enet. Der vermehelt ime zu der ee Mathildem. auß der gepare er ottonem den großen vnd Heinrichen hertzogen zu bayern. Otto der groß gepare Ottonem den roten. Derselb ander Ott gepar den dritten Ottonem. Hertzog Heinrich zu bayern gepar Heinrichen den heilligen vnd starb nach der gepurt christi .ix^c.xcv. iar.^[1] vnd ist begraben zu Regenspurg in sannt Haymrands closter. Derselb hertzog Heinrich het zwen su^en vnd ein tochter. Der ein sun hieß Heinrich der gu^eetig vnd wardt darnach kaiser. der ander Bruno darnach bischoff zu Augspurg. die tochter hieß Geysila. die wardt ko^enig Stephano zu hungern vermehlet vnd durch sie das ko^enigreich zu christo bekeret. Als aber der heillig kaiser Heinrich sein gemahle als ein schwester liebet vnd sie nye erkennet vnd deßhalb keinen ku^enftigen erben auß ir weßte do hat er irdische ding in himlische verwandlent. ein bischofthumb in sant Peters vnd sant Georgen ere vnnd sunst vil werck der gu^eetigkeit gestiftet. Als nw diser kaiser Heinrich dem tod nahnet do zohe ein große menig der teu^efel mit großem rawsch vnnd gethu^emel fu^er eins heilligen aynsidlers zell. der fraget einen auß den teu^efeln wohyn sie wolten. der antwurtet. zu des kaisers tod ob wir ichtzit an ime finden mo^echten. der aysidler beschwu^or den teu^efel das er darnach wider zu ime komen vnd ime erfarne ding sagen solt. do kom der teu^efel wider vnd sprach. sie hetten nichtz geschaft. dann als gu^ote vnd bo^eße ding auff die wag gelegt worden wern. vnd wir aber maynten das wir hyngewegen hetten do kom der verprennt oder gero^escht Laurencius vnd leget einen schweren guldin hafen auff die seytten des gu^otten das dieselb seyt fu^erwu^oge. do erbrache ich auß zorn demselben hafen ein ore ab. Nw was dasselb ein kelch den hieß der teu^efel einen hafen. vnnd also gross das zway o^ern daran waren. der noch hewt bey tag zu merseburg gezaigt wirdt. den der kaiser in sannt Laurentzen ere daselbsthin geschafft het. Darnach erfunde sich das deßmals kaiser Heinrich gestorben vnnd dem kelch ein o^ere ab was.

ABer sant Rungunden geschlecht halben ist es also gestalt. das der groß kaiser Karll kaiser Ludwigen den gu^etigen. vnnd derselb kaiser Ludwig vnder andern drey su^en. als Carolum ko^enig in Gallia. Ludwigen ko^enig zu franckreich vnd Sigifridum pfaltzgrafen bey rhein geporn hat. Der gepar auß seiner gemahel Mathilde drey su^en vnnd ein tochter. Nemlich Theodoricum bischoffen zu metz. Adelbertum thumbherrn daselbst. vnnd Heinrichen pfaltzgrafen bey rheyn vnd hertzogen zu bayern vnd dise heillige kunegundum. die wardt kaiser Heinrichen vermehlet vnnd wiewol sie mit ime keu^eschlich vnd heilligclich lebet so wardt sie doch von ime auß teu^eflischer zuplasung mit eim ritter verargkwonet vnd zu benemung irer vnschuld auff glu^eenden pflu^og scharen zegeen gedrungen vnd sprach. O got als du mich von kaiser Heinrichen vnnd allen andern vnberu^ert waißt also hilf mir. do wandert sie vnuerseret auff den glu^eenden scharen hin. Als sie nw zu lest. xv. iar in eim von ir gestiften closter in heßen gewesen was do starb sie vnd ward zu bamberg neben kaiser Heinrichen begraben. vnnd von irer manigfeltigen wunderwerck wegen in die zal der heilligen auffgenomen.

ALs zu den zeitten kaiser heinrichs in eim dorff des Magdeburgischen bistthumbs ein briester in sant Mangen kirchen am heilligen weyhennacht abent mess hielt do fiengen xviii. man mit. xv. frawen auff dem selben kirchoff an zetantzen vnd hoh zesingen. die irreten den briester in seim ambt vnd wolten dauon nit lassen do fluchet ine der briester das sie ein gantz iar on vnderlaß also singende tantzen mu^esten. vnd die weil fiel weder taw noch regen auff sie. so wurden sie weder hungerig noch mu^eed. auch ire klaider vnd geschu^ehe nit geprechlich[.] Nach verscheynung des iars warden sie von dem ertzbischoff entledigt. ettlich starben alßpald. ettlich schlieffen drey nacht aneinander. ettlich zitterten ir lebtag.

Willigis bischoff

Geisila ko^enigin

WIlligis ertzbischoff zu Mayntz was eins wagners sun. der het ime zu vnuergessenheit seins vrsprungs in seiner schlafkamer mit großen bu^ochstaben geschriben. Willigis willigis gedennck wannenher du komen bist. Er hieng auch reder an den wenden auff. Von dannen her fu^ert die Mayntzisch kirch reder in irem panyer.

Geisila die edel iunckfraw kaiser Heinrichs schwester wardt Stephano dem ko^enig zu hungern vermehlet. Auß fleiß der selben empfiengen der ko^enig vnd das hungerisch volck den cristenlichen glawben gentzlich.

CLXXXVIII recto:

der werlt

Blat CLXXXVIII

Hungerisch ko^enig // Sant Stephan

STephan ein ko^enig zu hungern ein sun Geyche auß Sarolth der tochter Gynla geporn hat in seiner iugent einen erlichen krieg wider Cupan den starcken mechtigen hertzogen gefu^eert vnnd obsigung erlangt. vnd nach ko^enigclicher empfangner kron wider Gynlam seiner mu^oter bruder gekriegt vnd ine vberwunden vnd mit weib vnd kindern in hungern gesendet vnd ime die gegent ihenßhalb walds eingegeben[.] Als er nw Geisilam kaiser Heinrichs schwester zu der ee genomen het do wardt auß hilff vnd vnderweisung Alberti des bischofs zu Prag diser ko^enig erstlich. vnd darnach alles sein volck zum cristenlichen glawben bekeret. Darnach bestritte ko^enig stephan den vberreichen hertzogen des volcks Bulgarorum. von desselben genomner habe gu^eettern vnd reichthu^emern hieß er zu alten ofen in sant peters ere ein closter pawen. Als er nw alle nahend gelegne vo^elcker vndertenig gemacht. vnd ime fu^ergenomen het das ko^enigreich Emerico zeu^ebergeben vnd go^ettlichs diensts vnd der bescheu^elichkeit zewartten do wardt er mit schwerer kranckheit beladen vnd starb im. xxxvii. iar seins reichs vnd ward zu Stu^olweyssenburg. alda er dann in der ere der heilligen gottes gepererin ein kirchen gepawt het begraben. da er dann mitsambt seiner gemahel an stettigen wunderzaichen leu^echtet.

Sant Emericus

EMericus ein ko^enig zu hungern was des benanten sant Stephans sun auß geisila geporn. Er het mer su^en. aber diser was von iugent auff vor den andern bru^edern wider die gemaynen natur der menschen auß go^ettlicher begabung mit gerechtigkeit. klu^ogheit. senftmu^eetigkeit. barmhertzigkeit. miltigkeit. demu^eetigkeit vnd gedult bewappnet. vnd got lieb vnd den menschen angeneme. dem der vater die sorgkfeltigkeit der pflegnus vnd regirung des ko^enigreichs befolhen het. Auf das aber sein verstentnus durch boßheit nit verwandelt wu^erd so wardt er noch mit seiner gemahel iunckfraw wesende durch den tod hingenomen vnd von seiner manigfeltigen wunderwerck wegen von menigclichem heillig geachtet.

Sant Laßlaw

LAdislaus auch ein ko^enig zu hungern hat von der himlischen kron wegen die ko^enigcliche kron nye auff sein hawbt gesetzt. Nach empfangnem ko^enigreich wardt er ein tro^ester der betru^ebten. ein wideraufheber der verdruckten. ein gu^eetiger vater der waysen. vnd von den inwonern des ko^enigreichs ein gu^eetiger ko^enig genant. Er eroberet Dalmaciam vnd Croaciam. vnd erlanget wunderperlichen sige wider das volck Cunos. vnd vberzohe poln vnd beheym vnnd kome mit freu^eden wider anhayms. Zu letst starb er im. xix. iar seins reichs vol heilligkeit vnd tugent.

Sant Robertus ko^enig

RObertus ein ko^enig zu Franckreich fu^eeret diser zeyt ein gu^eetigs zusambt eim ko^enigclichem leben an heylligkeit vnd schriftlicher lere vnd weißheit alle cristenlich ko^enig vbertreffende. vnd was zu go^ettlichem dienst also geflißen das er zu zeitten so er mit kriegs henndeln nit beku^emeret wardt die ordenlich tagzeit mit den briestern sunge. das sagt man von ime. Als er auf ein zeit vor einer statt seiner feind gelegen wer vnd sein ordenliche tagzeyt bettet do weren die zynnen vnd mawr derselben statt eingefallen vnd also dieselb statt von ime gewunnen worden[.]

FVlbertus ein bischoff sol diser zeit vil lobgesangs vnd sunderlich von der iunckfrawen maria gemacht haben. vnd darumb in seiner kranckheit von ir mit irer milch erquicket worden sein.

Heribertus ertzbischoff zu Co^elne leu^echtet diser zeit an tugenten vnd heilligkeit.

GEbhardus ein bischoff in pannonia ist diser zeit von den feynden cristenlichs glawbens auff einen karren gepunden. auff einen hohen berg gefu^eert vnd vberab gelaßen vnd also gemartert worden.

Vdo bischoff

VDo erstlich ein vngelirniger vnd tunckelsynniger schu^oler zu Magdeburg ru^effet die ko^enigin der himel vmb gelirnigkeit an. die verhieß ime weißheyt vnnd das bistthumb. Nw wardt er gelert vnd darzu auch ein bischoff daselbst. aber er was aygens hayls vngedechtig. auff wollustperkeit des fleischs geflißen. der kirchen sachen versewmlich vnnd mit vnordenlicher lieb einer abbtissin befleckt. vnd darumb allermenigclichem haßlich. Der ho^eret in der nacht ein solche stymm. Vdo ho^er auff von disem spil du haßt gespilet vil zeuil. aber er verharret in seinen wollu^esten. Zu letst sahe ein chorherr derselben kirchen bey nacht in sant Mauricien chor ein schar der hailligen. vnd vdonem zum tod verurteylt vnd enthawbtet vnd von der seytten der abtissin daselbsthin gefu^eert. vnd von der iunckfrawen maria verclagt. als dann das plu^ot des vnseligen vdonis in eim weißen marmorstain dess anzaigung gibt andern bischoffen zu warnung vnd erschrecken.^[2]

---

1. 995 n. Chr.
2. Diese Erzählung wird auch in Zedlers Universal-Lexicon 1739 erwähnt: Zedler:Magdeburg, der Dom zu