Die Schedelsche Weltchronik (deutsch):174

 

173 <<<Vorheriges Blatt	Die Schedelsche Weltchronik    Blatt CLXXIIII	Nächstes Blatt>>> 175
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CLXXIII verso:

Das sechst alter

JOhannes der .ix. ein ro^emer nach theodoro babst erkorn hat die sachen des babsts Formosi alßpald in gentzigkeit vnd widerbringung gesetzt auff widerstand des merern tails des ro^emischen volcks. darauß entstu^ond ein solche auffru^or das es schier zum krieg komen wer. dann er zohe gein rauennam versamlet daselbst .lxxiiii. bischoff vnd vernichtiget die hanndlung babsts Stephani vnd bestettiget die sachen Formosi mit ertaylung. das Stephanus vnordenlich gesetzt het. das die ihenen widerumb zeweyhen vnd zeordnen weren die Formosus zu der weyhe vnnd ordnung beru^eefft het. So^elchs kome auß dem das die bebst ab den fu^oßstapffen sant Peters getretten weren. vnd der gemain cristenlich stand fawl. treg vnd versewmlich vorgeer oder regirer het. Diser Johannes starb im andern iar seins babstthumbs. vnd ließ nichts gedechtnus wirdigs dann allain das er ettliche schier außgelo^escht zwittrachtigkeit herwiderumb vernewet.

BEnedictus der vierdt auch ein ro^emer wardt von seiner gu^eetigkeit vnd mu^etigkeit wegen zu babst erkorn. der dann mit großem lob in solchen zerru^edten sitten der bebst sein leben bestendigclich vnnd on gemercke oder mayle einicher verlewmung durch fu^eeret. Doch finden wir nichtz von ime beschehen das fast geolbt werden mo^echt. dann derselben zeit begegnet ein solcher vnfall das alle tugent in dem hawbt vnd auch in den glidern auß versewmlichkeit vnd laßheit der menschen verzeret was. Er starb seins babvthumbs im andern iar.

LEo der fu^enft ein babst (dess heymannd die gschihtbschreiber nit setzen) ward von cristofero seinem diener auß begirde zeherrschen gefangen vnd in den kerker geworffen. das dann on große aufru^or vnd on vil menschen verderbnus nicht beschehen mocht. Also beku^emeret cristoferus den babstlichen stu^ol am .xl. tag des babstthumbs Leonis. Vnd als nw diser Leo sich der eren berawbet sahe vnnd zuuoran von eim diener dem er vil gu^ottat bewisen het do starb er vnlang darnach von schmertzen seins gemu^eets.

CRistoferus des vaterland vnd zunamen von seins vnadels wegen nit wissentlich ist hat nach dem außgeworffen Leone den babstthumb mit bo^esen ku^ensten vnd argen listen erlangt vond bo^eßlich wider verloren. dann er wardt in dem sibenden monat der wirdigkeit (gar billich) berawbt vnd in ein closter gestoßen vnd darnach von babst Sergio seinem nachkomen wider auß dem closter genomen vnd in einen offen kercker geworffen. vnd vnlang darnach ime zu gro^eßrer pein in einen harttern keker gedrungen. daselbst starb er zu letst ellendigclich vnd erbermdlich.

MIchaelis des ertzengels erscheinung ist vor disen zeiten in apulia bey der statt Sypontum auff dem berg Gargano beschehen. darauff dann nachfolgend von solcher gedechtnus wegen ein statt mit eim tempel vnd andern scho^enen gepewen aufgerichtet wardt. Daselbsthin noch bis hieher auß aller cristenlicher erden vil volcks mit grossem zulawff wallet.

NAch disen zeitten sind fewrine fackeln am hymel vnd scheynend vnd vngewo^enlicher weiß durcheinander lawffend stern gesehen worden. Vnlang darnach zohen die hungern in welsche land vnd beschahen groß schlachten zu beder seytten.

'EIn comet vngewo^enlichs glantzs erschyne. darnach volget ein große gu^eß der wasser. vnd sunderlich in sachsen.

SErgius der dritt ein ro^emer hat nach empfangnem babstthumb die lateranensischen sant Johansen kirchen. die deßmals pawfellig worden was widergepawet. vnd dieweil er nochmals ein diacon was do keret er fleiß an zeuerhindern dz Formosus nit babst werden solt. Demnach wardt er von formoso verfolgt. Als er aber babst wardt do zohe er in Galliam. vnnd keret darnach auß gunst vnnd gnad Lotharii widerumb in welsche land vnd fieng Cristoferum den verfolger des babstthumbs vnd leget ine in fangknus vnd vernichtiget die geschihten vnd handlungen Formosi also das not was die ihenen nochmals zu der weyhe zuzelassen. die formosus briesterlicher weyhe wirdig geachtet het. vnd zu einer rachsale ließ er seinen leichnam auß dem grab ziehen vnd ine als wer er lebendig enthawbten. vnd den leichnam in die Tyber werffen in gestalt als wer er der begrebnus vnd menschlicher ere nit wirdig.

CLXXIV recto:

der werlt

Blat CLXXIIII

LVdwicus der dritt des kaisers Arnolphi sun volget seim vater im regiment nach.^[1] im iar des hayls .ix^c.iii.^[2] vnd regiret .x. iar. vnd mocht doch nach dem das reich in zerstrewtem wesen stund zu der kaiserlichen bekro^enung nit komen. Aber die franckreichischen setzten ine nach seinem vater zu eim ko^enig der frantzosen vnnd teu^etschen vnder dem tittel des kaiserthumbs. vnnd wardt in dem stettlein Forchem zu ko^enig gemacht. vnd auff das er Lendebuldo dem die Lothringischen fu^ersten widerwertig waren widerstand thun mo^echt so wardt er zum reich des gantzen belgischen niderlands gefordert. darauff verheeret vnd verwu^eestet Lendebuldus Lothringen mit waffen vnd fewr. Aber er wardt zu letst von den grafen Stephano Gerardo vnd Manfredo erschlagen. Nach der menschwerdung christi .ix^c.v. iar^[3] zohe Ludwicus der sun Bosonis des ko^enigs der ro^emischen gegent vnd burgundie in welsch land vnnd bracht es alles in seinen gewalt. schicket sein ritterschaft von ime vnd kome mit klainer anzal gein Beren. daselbst wardt er durch verretterey gefangen vnd seins gesihts berawbt. vnd Berengarius in das welsch ko^enigreich mit dem kaiserthumb eingesetzt. Aber ludwig der ko^enig teu^etschs lands vnd bey den frantzosen vnd teu^etschen ein kaiser starb on erben. In dem vnd in Lendebuldo seim bruder sol sich (als man sagt) das Carolinisch geschlecht geendet haben. vnnd also ist das kaiserthumb das das geschlecht des großen kaiser Karls hundert vnd .x. iar beseßen het auff die longobardischen gewendet worden. Nach absterben kaiser Ludwigs wardt Otto der hertzog zu sachsen gar ein hohberu^embter betagter fu^erst von menigclichen zum regimennt gefordert. aber er wolt sich auß vrsachen seins alters da mit nit beladen laßen.

CVnradus der erst ein sun Cunradi. den graff Albrecht erschlu^og ward auß rat des benanten hertzog Otten mit aller frantzosischen verwilligung zu ko^enig erkorn. im iar des herren .ix^x.xiii.^[4] Er ist zu der kaiserlichen bekro^enung nit kome. noch auch von den walhen so er bey inen nicht geregirt hat vnder den kaisern gezelet. doch regiret er bey den teu^etschen vnd gallischen .vii. iar. Im ersten iar seins reichs warden die hungern. die zu verwu^eestung des ertreichs außgerayset warn von den schwaben vnnd bayern bey dem rhein ernidergelegt. Darnach fluhe Arnolphus der hertzog zu bayern der dann ko^enig Cunraten widerwerttig was mit weib vnd kindern gein hungern daselbst blibe er bis ko^enig Cunrat starb.

HEinricus der erst der demu^eetig genant ein hertzog zu sachßen hertzog otten sun regiret in dem orientischen franckreich. vnd empfieng in dem iar des herren .ix^c.xx.^[5] in teu^etschen landen das kaiserthumb. vnd herrschet .xviii. iar dieweil Carolus der ko^enig zu parys das nyder franckreich regiret. Er hat die hungern vnd beheim die dz sachsisch lannd vberzogen hetten mit schwerer irer nyderlag bestritten. Sein eegemahel hieß Mathildis. die wz ein durchleu^echtige fraw wunderperlicher su^eßigkeit. gnad vnd senftmu^eetigkeit. vnd mit glantz aller andrer tungent gezieret. Die gepare von dem sachsischen geschlecht Ottonem den großen. vnnd Heinrichen hertzogen zu bayern. Aber die schwester diss Heinrichs Baba genant gepare graff Albrechten. von dem hernach meldung beschiht. Diser Heinrich hat das heillig speer mit den nageln christi ihesu von Rudolpho dem ko^enig zu burgundia mit bedroungen erlangt. vnd ime auch ettliche schanckung. vnd einen tail des schwebischen lands deßhalb gegeben. vnnd dasselb sper seinen nachkomen zu einer zierde vnd beschu^etzung des kaiserthumbs gelaßen.

ZV den zeitten Ludwigs des dritten hat der edel Albrecht graff zu Francken hertzog otten zu sachßen enicklein Cunraten ko^enig Ludwigs sun erschlagen. demnach belegeret ko^enig ludwig denselben albrechten im schloß babenberg. der wardt auß betriegnus vnd arglistikeit hattonis des mayntzischen ertzbischofs zum kaiser gefu^eert vnd enthawbtet. Auß seinem plu^ot sol vrsprung gehabt haben der albrecht der darnach o^esterreich an des ro^emisch kaiserthumb gebracht hat.

HAtto ertzbischoff zu mayntz ist der. der graff albrechten von babenberg listigclich in den tod gegeben hat. Diser Hatto het auch auff ko^enig Cunrats anregung ein guldeins halßpannd laßen machen in fu^ersatz hertzog Heinrichen von sachßen. dem ko^enig Cunrat feind was da mit zefahen. Aber hertzog heinrich wardt gewarnet vnd der bischoff seins argen anschlags berawbt. vnnd vber drey tag darnach mit eim donrslag geto^edt. von den teu^efeln in einen fewrigen prunnen auff eim berg in Sicilia gestu^ertzt.

---

1. Ludwig III. Bosonides, genannt der Blinde (881/82–928) war König von Niederburgund 887–928, König der Langobarden 900–905 und Römischer Kaiser 901/02–905.
2. 903 n. Chr.
3. 905 n. Chr.
4. 913 n. Chr.
5. 920 n. Chr.