Die Schedelsche Weltchronik (deutsch):126

125 <<<Vorheriges Blatt	Die Schedelsche Weltchronik Blatt CXXVI	Nächstes Blatt>>> 127

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CXXV verso:

Das sechst alter

Dorothea die glorwirdige iunckfraw in Cesarea der statt Capadocie wardt dieser zeit von cristo wegen ergriffen. an einem schnelgalgen aufgehebt. darnach mit feu^esten hart geslagen vnd zu letst enthawbtet. in irem außgang belachet sie Theophilus sprechend. Ey du gespons christi libe schick rosen her von deins gesponsen paradis. also auß fu^erbete. Dorothee erschine im ein kind tragende in eim ko^erlein drey o^epffel vnd drey rosen Theophilo zebringen. der empfieng die pald in verwunderung dann es was ein kalte zeit in dem monat Februario vnnd er wardt bekert vnnd nach schwerer peynigung enthawbtet.

Eleu^etherius der durchleu^echtig ritter wardt in diser verfolgung mit vil vnzallichen menschen zu Nicomedia gemartert. auß den ettlich enthawbtet. ettlich verprennet vnd ettlich in das meer gestu^ertzt warden. als diser Eleu^etherius in allen glidern seins leichnams gepeynigt vnd ye vnnd ye kreftiger wardt do wardt er zu letst als gold mit fewr beweret vnd mit der martrer kron begabet am andern tag des monats octobris.

Sergius vnd Bachus die edeln mann vnd fu^ername bey dem kaiser Maximiano warden in diser aufru^or gein ime das sie cristen wern verclagt vnd darumb in den tempel Jouis gefu^ert. daselbst die ago^etter anzebetten. do sie das nit thun wolten do warden sie irer ritterlichen klaider entplo^esset vnd Bachus mit rohem geadere plu^etflu^essig geslagen vnd bis zu zerreißung seins bauchs vnd lebern gedenet. vnd nach seim absterben sein leichnam durch die fo^egel vor den wilden thiern bewaret bis der begraben wardt Aber do Sergius sich auch nit abwencken wolt lassen do warden ime genagelt schu^oh angezogen in den mu^ost er vor eim wagen vil meyl lawffen. Zu letst ward er im cristenlichen glawben bestendig wesende enthawbtet.

Die vier gekro^enten. nemlich Seuerinus. Seuerianus Carpopherus vnd Victorinus wolten auff gepott Diocleciani dem abgot Asclepio nit opffern darumb warden sie mit pleyzaynen tod geslagen vnd ire leichnam den hunden an die gassen fu^ergeworffen. die sannt Sebastian mit dem babst Melchiade bey nacht begru^obe.

Fides die heilig iunckfraw wardt in der statt Ageno von dem richter Diciano mit liebkoserey vnd auch mit bedroung angemu^otet den go^ettern der hayden zeopffern. do sie sich es wideret wardt sie auff ein erin rost außgedenet vnd mit darunter gestrewten kolen gepeynigt vnd so senft mu^etig in der marter gefunden dz sie damit vil lewt zu cristo bekeret. Do sanctus Caprasius (der sich auß forchten verborgen het) die marter diser iunckfrawen sahe. do bate er got sie zu einer vberwinderin zemachen. do sahe er ein schneeweiße tawben von himel steygen vnd diser iunckfrawen ein lichte kron von gold vnd edelm gestayn auff ir hawbt setzen vnd das fewer außleschen. darumb opfferet er sich einen cristen vnd wardt mitsambt Primo vnd Feliciano vnd diser iunckfrawen enthawbtet.

Euphemia die edel iunckfraw wardt bey der statt Calcedona mit andern. lxx. ergriffen. vnd darumb dz sie den abgott Mars nit eren wolt mit allen geschlechten der pein geeingstigt vnd ymmerdar bestendigclich erfunden bis in den todt.

Felix der bischoff in Apulia ist mit Adaucto Januario Fortunato vnd Septuno diser zeit als sie lang im kercker geheilligt warden durch gantz Affricam vnd Siciliam mit vil engstigung gefu^eert vnnd zu letst enthawbt worden.

Felix ein andrer vnd Fortunatus gebru^edere sind in diser verfolgung zu Aquileia an eim schnelgalgen auffgehenckt worden. die peiniger hielten prennend stayn disen zwayen martrer an ir seyten. die warden auß go^etlicher kraft außgelo^escht. darnach warden sie mit siedendem o^ele begoßen. Sie bliben aber vnuerletzt. Zu letst warden sie enthawbtet amm. xi. tag Junij.

CXXVI recto:

Blat CXXVI

der werlt

Margaretha die scho^enst iunckfraw auß Antiiochia von haidnischen eltern geporn. einer nererin vberantwurt hat sich willigclich laßen tawffen. als sie nach absterben irer muter bey irer nererin der schaff warttet vnd. xv. iar alt vnd fast wol gestalt wz do wardt Olibrius in begirde zu ir entzu^endet. aber do er erkennet das sie ein cristin wer leget er sie in den kercker vnd do sie sich die abgo^etter anzebetten wider setzet wardt sie aufgehenckt mit ru^oten iemerlich geslagen vnd ir flaisch mit eyßnin krewln zerrißen vnd wider in den kerker geworffen. alda erschine ir der tewfel in gestalt eins drackens als wolt er sie verschlicken aber sie machet ein zaichen des creu^etz vnd er verschwunde. darnach hieße sie der richter enthawbten am. xij. tag Julij vnd sie bate fu^er allermenigclich. auch fu^er die verfolger vnd fu^er die geperenden frawen. die sich ir in der geperung befelhen.

Maximilianus auß der statt Ceyla von edeln vnd andachtigen eltern geporn ein hoherfarner vnd tugentreicher man wardt nach absterben sancti Quirini des Laureacensischen bischofs von allermenigclichem zu eim bischoff daselbst erwelet vnd zu der zeit Lari vnd Numeriani der zwayer kaiser. darumb das er die abgo^etter nit eren wolt in den tempel martis gefu^eret vnd von den hoflewten gemartert. zu Ceyla außerhalb der mawr im iar christi. ij^c. lxxxix. am. xij. tag octobris. dem der hertzog zu Bayrn gein Passaw gebracht hat da dann sein gedechtnus gehabt wird

Blasius (der dann in aller heiligkeit vnd senftmu^eetigkeyt plu^eet) wardt von den cristen in Sebaste der statt Capodicie zu bischof erwelet. Diser Blasius gienge zu empfliehung der grawsamen verfolgung in ein ho^ele eins bergs da hin komen die wilden thier. die hailet er. so brachten ime die raben speys. do das der richter ho^eret hieß er ine fu^er sich bringen. Blasius thet vnderwegen zaichen. er wardt in einen kerker gelegt vnnd von verschmehung wegen der abgo^etter an ein holtz aufgehenckt an seine leichnam mit eyßnin krewln gerissen. sieben cristen frawen hu^oben sein plu^ot auf. die warden enthawbt. deßgleichen auch Blasius mit zwayen klainen su^enen. derselben weiber.

Juliana die durchleu^echtig iunckfraw von Como der statt Gallie hat diser zeit daselbst vil vnd mancherlay grawsamer marter vnd peynigung erlidden. vnd darnach offenlich mit dem teu^efel gefochten. vnd ine ritterlich vberwunden. vnnd nachfolgend abermals vil marter geduldet vnd zu letst wardt sie enthawbtet. amm. xvi. tag februarij.

Primus vnd Felicianus die ro^emer vnd gaistlich mann haben in diser verfolgung nach vil ertichter paynigung darumb das sie den abgo^ettern nit opffern wolten durch enthawbtung die kron der martrer erlangt am. ix. tag Junij.

Pamphilus ein kriechischer briester vnd ein verwandter Eusebij cesariensis ein treffenlicher lerer der heiligen schrift ist diser zeit bey der statt Lesarea des lands Palestine gemartert worden am ersten tag des monats Junij.

Quintinus ein Gallischer ritter hat von Maximiano dem kayser am letsten tag des monats octobris die marter erlidden vnnd sein leichnam ist darnach vber. lv. iar vnzersto^ert gefunden worden auß englischer offenbarung.

Ruffus der hhoberu^embt ro^emisch ritter wardt von dem kaiser Diocleciano mitsambt allem seinen hawßgesind mit vil plagen beru^ert vnnd zu eim cristenlichen ritter gemacht. vnd wiewol vnzallich cristenlich lewt erto^edt worden sind. so sind doch die beru^embsten vnd namhaftigsten bedacht vnnd hie bestu^empt worden.