Der klei’ Gaunshiat

 Der klei’ Gaunshiat.

Am Bächle leit a grüanar Roi’,
Und dea’ haunt älli Burger gmoi’,
S geit niamad Pfacht und niamad Zeins,
Dô hüatat s Büabli seini Gäuns.

5

Und daß es d Gäunsla hüata muaß,

Des ischt em grad koi’ häti^[1] Buaß.
A mengas, wo wia des so klei’,
Muaß Hennahiat und Kindsmagd sei’.

Und s Hennahüata ischt a Schand,

10

Weil des die Ällermindschte thant,

Au s Kindumtraga, denk nu’ dra’,
Stôht so ma’ Buscht doch gwiß it a’,

Wo Hosa wia die Graußi trait
Und dea’ ma’n au schau’ schwöra hait^[2]

15

Wo lout schau’ mit der Goißal schnällt

Und hofreacht^[3] bis uff hundert zällt.

As ischt noh um a Jährli z thant,
Nôch nimmt as s Loitsoil au in d Hand
Und schüttlat hott^[4] und zuicht gauh’^[5] wischt^[6]

20

Und füahrt em Vater nous da Mischt.

Des Büable hüatat zwôr nu’ Gäuns,
Doch hôts a Stölzle schau’, a kleins,
S trait s Käpple uffam reachta’n Auhr
Und blôsat Ländler uffam Rauhr.

25

As blôsat luschtig uff die Knui

– Unds däaff, denn d Wealt ischt wieder nui,
Dô, s Thal mit seini Früahlingssträuß
Und s Dörfle dött vom Bluascht so weiß!

Du bischt noh glückle, Bua, und frei,

30

Aß wia der Vogel uffam Zwei,

Was diar der Moanzi^[7] eaba bring,
Des kümmrat di koin Pfifferling.

O Büable mit der Schweabalpfeif^[8],
Du woischt noit, daß a gotzger^[9] Reif

35

Dui Hearrlichkoit verderba ka’ –

Blôs zua, blôs zua, fang vonna a’!

---

1. Harte.
2. Fluchen hört.
3. Frischweg.
4. Rechts.
5. Bald.
6. Links.
7. Morgige Tag.
8. Querpfeife.
9. Einziger.

Worterklärungen (Wikisource)

• Gaunshiat: Gänsehirt
• grüanar Roi’: Wiese
• gmoi’: gemein (Allmende)
• schwöra hait: fluchen hört
• Goißal: Peitsche
• Loitsoil: Zügel
• Bluascht: Blust = Blüten
• der Moanzi: der morgige Tag