Aachener Stadtrechnungen aus dem XIV. Jahrhundert/Beilage XI.
Lieve herren ind vrunde, yr sult wissen dat Mathiis Kassart leider doit is ind in soittersdage zů åvent onnutzlich umt huys lief, blois, buyssen ymans wisse ind sonder gewer, also dal he geschossen wart beneven aen sinen sloiffe, also dat he siich bigette ind siin testament deide, ind des morgen op den sondach mysse hoirtte ind dat heillige sacrament untfienck ind zů seys uren nae middage starff in goiden kennis, also dat he zer Sleiden begraven is, als heis begert hait, dat uns allen truwelichen leit is, dat he als onnutzlichen bleven is. Vort so wist, dat der hertzoge van Gelre zer Sleiden geweist is, ind hedde gerne umb eyne soene gededinckt, also dat he hye geloissen hait siinre vrunde eyns deils, die mit den van Blankenheim ind van Gerartzsteine alle diesen dach mit den Gesworenen umb eyne soene gededinckt haven, die doch sere onnůtzlich bieden; doch so dunckt uns, dat die herren gerne van stat weren, ind wir die nyet en vinden, als wir lest dar van schieden, doy die gesworenen bii eyn woren, ind als die reces inne halden, ind die herren nyet hie in sint mit yren
[91] bliden noch mit yren bussen als sii siin sůlden, also dat noch egeyne blide me opgericht in is hudezedage, dan die unse. Vort so moicht yr besien, nåe deme die herren als zwiiflich sint, off dan yet gededinckt wirt mit den meisten part, off wir yn volgen willen, off wir uns hart dar widder legen willen. Vort so hedden wir uch die wagen heym gesant, nů wene wir alle dage, dat die herren opbreichen můchten, dat wir henden bliven muesten; mer sien wir, dat die herren dar bii bliven willen, so sullen wir uch die wagen heim senden. Ouch so wist, dat dit huys van Riifferscheit eyn geweldich vast slos is ind zienwerf besser is, dan dåe mant vur hilt, ind Joncher Johan is selve dar op mit vil rischer kneicht, die alle dage den heren groissen schade důent, mit namen haint sii afgevangen den buyschof van Luycghe sinen panetier ind dar zů sinen bůttelier ind einen kneicht doit geslagen ind seys pert genomen, ind der hertzoge van Guylche hait doden zwene ind pert verloren, ind ouch haint sii eme zwåe cargen genommen van siinre donrebussen ind sinen meister, mit namen Johanes van Vlatten, durch siin beyn geschossen. Vort so haint sii der Coelner gevangen ind ouch pert genomen. Vort so hain wir onsen gesellen ernstlich gebeden ind bevolen, dat sii siich op allen enden hůeden, op dat sii nyet gequat en werden. Vort so is her Pote hye ind hait des riichs banier hudedisdachs opgewurppen vur siinre logen. Vort so sint wir alle samen mit unser geselschaf Gode danck gesont ind birve uysgescheiden, dat wir uch geschreven haint van Thiis Kassart. Wist ouch dat grois bruche is van provancien want dar nyet veile in kůmpt ind die eyffelsche herre zemoil sere dreuwen, dat man sy alle dage voidert. Got sii mit uch, datum vigilia Assumpcionis.