Aachener Stadtrechnungen aus dem XIV. Jahrhundert/Beilage V.
Die Verbündeten: Friedrich, Erzbischof von Köln, – Wenzeslaus u. Johanna, Herzog u. Herzogin von Luxemburg, Limburg, Lothringen, Brabant, – Wilhelm, Herzog von Jülich, – und die Städte Köln und Aachen führen zur Deckung der mit der Aufrechthaltung des Landfriedens verbundenen Unkosten für die Dauer desselben in ihren Ländern Zölle ein, 1375 den 14. April. Auf Perg.
Wir Friderich van der Goitz genaden der heyliger kirchen zů Colne ertzebusschoff, des heyligen und roymsschen riichs in Italien ertzekentzeler ind desselven riichs dissiite des gebirges gemeyn vicarius, – Wentzelaus by derselver genaden hertzoge ind Johanna hertzogynne van Lucembůrg, van Limbůrg, van Lotrynge ind van Brabant, – Wilhem by der vůrs. genaden Goitz hertzoge zů Gůylche, Greve zu Valkenburg ind herre zů Montyoy, – ind wir .. richtere .. scheffene .. rait ind bůrgere gemeynlichen der stat van Colne, – ind wir .. bůrgermeistere .. scheffene ind gemeyn rait des conyncklichen stůyls van Aichen důn kůnt allen luyden, want wir umb des gemeynen lands noit ind beste ind Goide zů eren ind zů loyve ind dem gemeynen coufmanne zů troiste eynen lantfrieden ind eyn verbůnt under uns gemachet ind geswoiren han zehalden vier gantze jair tusschen Mase ind Riin bynnen den tirmpten des circles diss verbuntz, in alle der formen ind wiise, as die brieve inhaldent, die tusschen uns darup synt gemachet, ind want dis lantfriede ind sulche beschirmnisse as dar zu gehoirt nyt zehalden noch zedůyn en is bůyssen groisse kost, die sich darzů heischt ind gebůrt, – ind wir .. herren ind stede vůrs. vůr ziiden gesien han an anderen lantfrieden ind verbůnden, die wir ouch umb gelyche noit der lande under uns gemachet hatten, dat die umb gebreches willen der koste nyt also gentzlichen gehalden wůrden, as dem gemeynen lande noit was, ind zůleste umb desselven gebrechs willen zemale nyderlagen ind avegiengen ind geyne weer danaff en geschach zu groissen verderfflichen schaden des gemeynen lands, – ind want die boissheit in desen landen sich also sere nů verwassen hait, dat des noit is, dat man die were ind kere, so is ouch des noit, dat man disen lantfieden in allen sachen also besorge ind sůnderlingen mit der koste, die dar zů geburt, also vůrste, dat he diebas ind de harder gehalden werde ind geyn gebrech darin en valle. – Herumb so han wir herren ind steide vůrscr. eyndrechtlichen dat besorget, ind umb dat gebrech zeverhůden eyns gemeynen lanttolles [82] zů urbar ind behůeff dis lantfrieden overdragen, den man nemen sal die ziit uyß dis verbůntz ind nyt langer up den steden ind in alle der vůgen, as herna geschreven steit, datz zewissen, dat man den toll in yglicher unser driier herren landen as unss des .. ertzebusschofs van Colne, des .. hertzogen van Brabant, ind des .. hertzogen van Güylche nemen sal up den straissen, die tusschen Mase ind Riin důrch unse lant van eyme lande in dat ander geent, also dat alle gůyt, dat toll geven sal, umer eyns tollen sal in yglichs herren lande vůrs., as mit namen zů Kůnynxtorp ind up anderen straissen in den gestichte van Colne, die tusschen Mase ind Riin uyss ind in geent, – vort zů Bercheim ind zů Birkistorp ind up anderen straissen in den lande van Gůylche, die tusschen Mase ind Riin uyss ind in geent, – vortme zů Royde ind zů der Wiiden ind up anderen straissen des lands van Brabant, die tusschen Mase ind Riin uyss ind in geent, ind up wilcher straissen eyne in ychlichs herren lande eynich gůyt vertollet hait, dat ensal in des herren lande nyt mee tollen, as ouch vurgeschreven steit. – Vort sal man desen toll nemen van alsulchen gude ind in der vůgen as herna volget, datz zewissen van yglichem perde, dat an wanen off an karren geit, die couffmansgůyt vůrent as: wiine, weyt, wolle, herinck, buchycg ind andere wissche, garne, vlass, liinwait, roede, allůyn, saltz, smaltz, smeer, bůtter, frůyt as: vygen, rosynen, mandelen, was, zyn, bly, knyte ind ander groff gůyt van gewichte, dat man mit dem zyntener verkouft ind deß gelych, sal man nemen van yglichem perde tzwene wiisse pennynge ychlichen van tzwen schillingen as nů genge ind geve synt. – Vort van yglichem perde, dat an wanen off an karren geit, die ander důrbar couffmansgůyt vůrent as mit namen: specierie, bůntwerck, syde, zendail, gewant, wůllen, syden of gůlden důyche off anders der gelych, sal man nemen van yglichem perde drii wiisse pennynge. Vort wat perde, die an ledigen getzouwen geent, die sullen vrii siin ind nyt tollen. Vort van allen couffperden, sii geen in getzouwen off nyt, van yglichem drii wiisse pennynge. – Vort sullen alle getzouwen ind die perde, die daran geent, die korn vůrent, as: weys, rocgen, evene, off anders wilcherkunen dat were, ind ouch holtz, kolen, heů ind stroy ind der gelych, ouch vrii ind ungetzollet siin. – Vort were eynich gůyt man off vrouwe, die wiin off ander gůyt, dat zů der liiffnarynge gehoert dede vůren, den off dat, he off sii zu dranckwiine ind zů der hůyskost ind nyt uff kouffmanschaff vergulden hette, dat sal ouch vrii gaen ind ungetzollet. – Vort umb dat dese vürs. toll debaz bewaert ind bestalt werde up allen enden in unsen der herren landen vürs., so han wir .. herren ind steide eyndrechtlichen dat bevoylen ind bevelen overmitz desen brieff unsen .. geswoiren diss [83] verbůntz, dat sii dar zů sien by den eyden, die sii uns gedain hant, dat dese tolle mit guden beschedenen lůyden bestalt werden, die der warden ind die upheven. Ind wir willen, dat die tolnere ind die gene, die dar zů gesat werdent, den vůrs. unsen geswoiren geloyven, sicheren ind sweren in unser aller behůef die tolle truwelichen zeheven ind zebewaren, ind so wat danaff kůmpt ind vervellet in die kysten zewerpen, die man dar zů haven sal, ind darzů ouch unse geswoirene die slůssele haven sullen, as ygliche partye van uns .. herren ind steeden eynen slůssel, ind vort rede ind beschedenheit danaff zedůne unsen vůrs. geswoirenen alle ziit ind wanne sii des van yn gesynnent; ind dese vůrs. tolle ind sowat danaff kůmpt ind vervellet sullen wir .. herren ind steede vůrs. in urber diss lantfrieden under uns deylen ind bůren na martzalen des dienstz den ygliche partye van uns zů desem lantfrieden schuldich is zedůne, datz zewissen mit underscheide wir drii .. herren under uns drü deyl, as yglicher van uns danaff siin drytte deil, ind wir tzwae stede van Colne ind van Aichen under uns tzwein dat vierdedeil. – Vort so willen wir, dat die vůrs. unse geswoirne ymer zů driin maynden die tollkysten up yglicher stede vůrs. sullen důn upsleissen ind alle dat gelt, dat dan da is, by eyn důn brengen ind dat under uns .. herren ind steiden deylen, manlichem syn gebůr danaff zegeven ind zelyveren na dem as vůrscreven is, also doch dat dat gelt uns .. herren ind steiden in unse hant nyt en kome, mer dat dat overmitz unse geswoiren gekart werde zu der kost dis verbůntz ind anders nyrgen, ind die geswoirne sullen uns off unsen rentmeisteren danaff beschedene rechenschaff ind bewiisinge důn. Duchte ouch unse geswoirne, dat des noit were, dat man die vůrs. tolkysten ee upslůsse ind dat gelt daruyss neme zů urber diss verbuntz, so můgen sii die ziit kůrtzen, wanne sie des noit důnket ind des overdragent eyndrechtlichen off mit den meisten[ER 1] parte, ind so wat uns .. herren ind steden ind yglichen van uns van desen vůrs. tollen zů syme deyle ervellet ind gebůrt, dat en sullen noch en můgen wir in geynen anderen urber keren, dan in urbar der koste umb desen lantfrieden zebeschirmen ind zebewaren as vurs. is. Ind wert, dat dar enboyven yet overde, dat sal alle ziit na ordinancien unser geswoirne behalden siin ind ligen blyven zů gemeynen urbar dis lantfrieden umb den diebas zebeschirmen ind zebewaren. – Vortme umb dat der gemeyne couffman debas getroist sii ind sich des vůrs. tolles nyt enververe ind den die liever geve, so han wir .. herren ind stede vůrs. des gentzlichen overdragen ind ouch geloift ind geloyven overmitz desen brieff, wert sache dat eynchme couffmanne syn gůyt, dat he vůyrte důrch unser der .. herren lande, bynnen desen lantfrieden vůrs. genomen wůrde, danaff he synen [84] toll up eynge der vůrs. stede gegeven hatte, dat gůyt sullen ind willen wir .. herren ind .. steide vůrs. dem .. couffmanne richten ind betzalen ind die betzalinge zevorentz uyss dem vůrs. tolle důyn ind nemen ind vort van dem unsen asvyle dar zů důyn, dat der couffman betzalet werde ind verrichtt, datz zeverstaine, dat mallich van uns, na martzalen, dat he dient ind heeft an dem tolle, syn gebůr zu der richtigen ind betzalingen důn ind geven sal. – Vort so geven wir .. herren ind stede vůrs. den vůrs. unsen geswoirnen macht, die vůrs. tolnere ind die wartzlůyde, die dar zů gehorent, zesetzen ind zeentsetzen ind ouch die zestraiffen ind zecorrigieren off sii nyt beschedelichen endeden alle ziit, as sich dat heisschet ind gebůrt. – Vort want deser vůrs. tolle zů urber ind behůyff dis lantfrieden die vůrs. vier jaire ind nyt langer overdragen en is, so han wir .. herren mit namen vůrs. vůr uns ind unse nakomelingen dat geloift ind gesichert by den eyden, die wir gedain han van diss lantfrieden wegen, geloyven ind sicheren overmitz desen brieff, dat wir sementlichen noch unser eynich sůnderlingen die vůrs. tolle achter der vůrs. ziit nyt langer bůren noch heven sullen in unsen noch eynges van uns landen ind steden vůrs., noch heven noch bůren laissen van ymanne; mer die sullen asdan gentzlichen affgelacht siin sůnder alle argelist ind geverde; mer wert sache, dat wir desen lantfrieden na dese vůrs. ziit eyndrechtlichen lengeden, so sullen die vůrg. tolle ouch die ziit vort liigen ind blyven die ziit dat der lantfriede weert ind nyt langer. – Vort wert sache , dat eynghe vůyrlůyde die reichte straissen nyt envůren ind andere wege umbevůren, umb dat sii des tolles nyt engeven, so sal der vůyrman syn liiff ind gůyt verloren han, ind dat gůyt, dat he vůyrt, sal dem coufmanne ind syme herren unverlustich blyven, ind wat der vůyrman also vervůrt ind verlůyst, dat sal unser der .. herren ind der steede siin ind in urber des gemeynen lantfrieden comen, alle argelist ind geverde uyssgescheden in allen desen dyngen. – Ind des zů urkunde ind stedicheit so han wir .. herren .. vrouwe ind stede vůrs. mallich van uns siin siegel an diesen brieff gehangen, die gegeven is in den jaren unss herren důsent driihondert vůnff ind sieventzich up den palmeavent, dat was des viertzenden dages in dem aprille. –
- (Die an Pergamentstreifen hangenden Wachs-Siegel: des Erzbischofs Friedrich, des Herzogen Wenzeslaus und der Herzogin Johanna von Brabant, des Herzogen Wilhelm von Jülich und der Städte Köln und Aachen sind ziemlich wohl erhalten.)