Aachener Stadtrechnungen aus dem XIV. Jahrhundert/Beilage VI.
Auf Papier.
- Adresse auf der Außenseite: An heren Johanne van Punt ind heren Ger. Lewen, burgermeistere zaichen, unse gude vrůnde.
Gude vrůnde, wir begeren uch zu wissen, dat die heren ind steede gewarnt siint, dat sich groisse gewerff heven in den landen ind sunderlingen myt eym greven van der Marken, soe sich gewurven hait oever Riin me dan myt 400 geleyen, as man sait ind heist, dat hee vůr eyn slosse vallen wille, dat up Westfalen geleegen is, mer doch hait hee gesteren unsen genedigen here van Coellen siin leyn ind sinen rait up gesaicht, also dat sich die heren ind steede voerten, dat hee dat slosse van der Dick intsetzen wille, ind man vernomen hait, dat der van Waichtendunck by eme gesteren was oever Riin, de sich ouch sere wirft. Ind vort is unsen heren boitschaff komen, dat da boven in der Eyffelen eyn groisse gewerff soele siin, ind meynen alsus, quemen disse dri gewerff by einander, dat dat eyn groisse hoef siin soelde, dar umb dat sich disse heren ind die stat van Coellen sterken willen, ind uns zugesprochen haven, dat wir uns sterken willen, ind dat wir dat schuldich siin zu duyn nå inhalt des buchs, ind wa wir des nyet duyn in woelden, so willen siit uns myt den reicht ain wenen. Darup dat wir geantwert haven, dat uns unse stat ind unse vrunt zu verre gelegen siint, dat wir die nyet wale her brengen in kunnen, want wir angt haven, dat sy under wegen nydder moechten lichen, ind meynen umb un ze volduyn ind ouch die kost zu verhuden, dat yr bidden woelt 10 geleyen off 12, die by uns quemen, as dat her zu besien, ind as wir dat wisten, so woelde wir 10 off 12 geleyen intgein un schicken, up dat hies, dat wir gesterckt weren ind unse hoyff demere weyr eynen dach off zweyn, bis dit geruyt oever weir. Vort wiist, gude vrůnt, dat der herzoge van Gelre zwa naicht geweist is zu Bruche, ind hedde gerre gededingt van des sloss wegen; de ain ende danne gescheiden is, want die heren geyne dedinge hoeren in willen, man in setzen dat sloss in yer hant dat aff zu brechen. Vort so sent uns kruyt zer bussen, ind gelt, des wir nyet intberen in kůnnen. Ind off yr yet dedingen off guder meren wist van unsen genedigen here van Brabant, dat wilt uns schriven, of ouch van den here van Schoinvorst. Ind schriifft uns ummer zer stunt eyn [86] antwerde up disse punten vůrschr. Ind geyne antwerde in schrift yr uns up voil půnten, die wir uch geschreven haven, der uns noit were, dat uns vreymde hait. Vort so wirt uns alle dage zu gesprochen van der provancien die man uyss Aichs vůrt, da wir wenich up geantwerden kunnen, want wir voerten, dat unse stat noch dedinge hoeren moechte. Got sy myt uch, ind sent uns siegelwais. Datum des eirsten dages in Julio.