Zergangen ist manig wunneklicher tac

Zergangen ist manig wunneklicher tac·
vnd des meien bluͤte·
da von vns liep geschach·
nv treit man den schauernach
fúr die bluͤmen huͤte·
die man vf dem anger brach
ir schǒwet an die linden
wie senlich dú stat·
die er mit sinen winden
also verderbet hat·

Jener sich gemachet hat·
in eine troien sin gollier
ist zweier spanne breit·
sin har im vf die ahsel gat·
ia wen ich dc er iemen
einen mvlslag vertreit·
sin swert ist wol gesliffen·
ein múskar er trůc·
zwen vor im pfiffen·
der drite den svmber slůg·

Sich hůb in der stuben schal·
vor dem^{[WS 1]} gettelingen
der svmber lute erdos·
da tanzten megde vber al·
do zuhte er von dem ringe
die gv̊ten vf die schos·
nach einem vingerlin
verlenkt er ir die hant·
do sant ir brv̊der grin
nach hilfe sa ze hant·

Dar kom ir der lange rehwin
vnd des meiers brůder·
die trůgen starkú swert·
ein alter has was under in^{[WS 2]}
entworfen vmb ein fůder·
vf der strâsse vert
er lint an einer wende·
wie wenic er des genos·
er slůg in in die zende·
das in das blůt begos·

Anmerkungen (Wikisource)

1. Vorlage: den.
2. Vorlage: die heten einē altē has.