Wol mich des sliessens des si slos

Wol mich des sliessens des si slos·
dú liebe in dc herze min·
der stete mih noc nie verdros·
si mv̊st ob allen frowen sin·
min trost min heil vnd al min wunne·
dc niemer wib getroͤsten kvnne·
mich wan ir vil werder lib·
des swer ich ir tvsent eide· ich minne si fúr ellú wib·

Het ich der zêder bǒme tage·
die wolt ich mit ir eine leben·
ir aller lob ich gerne sage·
ie doch wil ich si niht begeben·
si si mir lieb vor allen wiben·
bi der stete wil ich an ir beliben·
swas darvmbe mir geschiht·
si ist mir in den ǒgen svͤsse· vnd kvme mir vs dem herzen niht·

Warvmbe solt ich si verlan·
sit si also vil der tvgende hat·
truͤge mich ein swaches wenkel dan·
ir liehter schin mich niht verlat·
der in das herze min erlúhtet
alsam des meien ton die heide erfúhtet·
mit siner freudebernden zit·
dú rose lúhtet vs dem blv̊men· als schinet si gar svnder strit·