Wol dir meige wie dv scheidest

Wol dir meige wie dv scheidest·
alles ane has·
wie wol dv die blv̊men kleidest·
vnd die heide bas·
dv hat varwe me·
dv bist kvrzer ich bin langer·
alse stritent si vf den anger·
blv̊men vnd kle·

Roter mvnt wie dv dich swachest·
la din lachen sin·
scham dich dast dv mich an lachest·
nach dem schaden min·
ist dc wolgetan·
owe so verlorner stvnde·
sol von minneklichem mvnde
solhe vnminne ergan·

Das mich frowe an froͤiden irret·
dc ist úwer lip·
an iv iemer es mir wirret·
vngenedic wib·
wa nemt ir den mv̊t·
ir sit doch genaden riche·
tv̊t ir mir vngenedekliche·
so sint ir niht gůt·

Scheident frowe mich von sorgen·
liebet mir die zit·
oder ich mv̊s an froͤiden borgen·
dc ir selic sit·
mvget ir vmbe sehen·
sich froͤit al dv́ welt gemeine·
moͤhte mir ein vil kleine·
froͤidelin geschehen·