Wol dir liebú svmerzit

Wol dir liebú svmerzit·
wol dir svmer diner schoͤne·
wol dir dv gist hohen mv̊t·
heide in gruͤner varwe lit·
dine kvnft ich iemer kroͤne·
wan si ist vúr truren gůt·
nahtegal·
sv̊sse singet·
dc es in dem walde erklinget·
sost geblůmet berg vnd tal·

Swen der meie troͤsten mag·
der liebe ân herze swere·
dú zit wart nie bas gestalt·
so froͤit mich kein svmertag·
nieman wan dú seldebere·
dú hat froͤide an mir gewalt·

si ist min trôst·
die ich da meine·
nieman me wan si alleine·
wil si ich bin vor leide erlôst·

Die ich alse lieb han·
in dem herzen alle stunde·
dú ist wandel vor behůt·
ah si ist lieb sist wolgetan·
an ir rose varwem munde·
were ein kvs vúr truren gůt·
swer si mag·
vmbevahen·
vnd mit kvs ir lieblich nahen·
den betaget ein selig tag·

Minne ich solde danken dir·
das dv wistest mine sinne·
an so herzeliebes wib·
minne tv̊ genade an mir·
minne ein frowe svͤsse minne·
hilf dc mich ir truter lib·
minne also·
dc dú reine·
mich als ich si lieblich meine·
ah so wird ich liebes fro·

Ach genade ein selig wib·
ah mins herzen kúniginne·
ah tv̊ noch genade mir·
ah genade lieber lib·
hilf dc ich noch lieb gewinne·
herzeliebe lit an dir·
hilf est zit·
mir vil armen·
la mich senden dich erbarmen·
sit min heil gar an dir lit·