Wol becleidet stet dú heide

Wol becleidet stet dú heide·
anger vnd der gruͤne walt·
bi der liehten ǒgenweide·
hoͤrt man stimme manigvalt·
in den owen vogelin doͤne·
meie wart noch nie so schoͤne·
den ich mit gesange· kroͤne·
noch so rehte wol gestalt·
Frowe sich
du solt mich
troͤste sit ich minne dich·

Sich froͤit al dv́ werlt gemeine·
gegen der wunnklichen zit
nieman truret wan ich eine·
sit si mir niht froͤide git·
der ich diene in ganzen trúwen·
dú wil minen kvmber nivwen·
ich lebe in vil starken rúwen·
von den meren iemer sit·
Frowe sich
du solt mich
troͤste sit ich minne dich·^{[WS 1]}

Ane got so hat min nieman·
den gewalt als si wol hat
itwiset mich des ieman·
stuͤnde es dem als es mir stat·
er gelǒpte mir zware
der ich diene svnderbare·
wie dv́ miner ivngen iare·
froͤide nider sigen lat·
Frowe sich
du solt mich
troͤste sit ich minne dich·^{[WS 2]}

Wer gesach ie creatúre·
die man weis in wibes namen·
also schone also gehúre·
dú darf sich des niht beschamen·
also kúsche vnd also gv̊te^{[WS 3]}·
also tvgenthaft in mv̊te
vnd an eren so behv̊te^{[WS 4]}·
dú ist ein selig wib benamen·
Frowe sich
du solt mich
troͤste sit ich minne dich·^{[WS 5]}

Anmerkungen (Wikisource)

1. Vorlage: Frowe ſich du ſolt· ⁊c̾·
2. Vorlage: Frowe ſich du ſolt· ⁊c̾·
3. Vorlage: gv̊t.
4. Vorlage: behv̊t.
5. Vorlage: Frowe ſich du ſolt· ⁊c̾·