Winter wil vns aber twingen

Winter wil vns aber twingen·
heide vnd ǒch den gruͤnen kle·
in dem walde vogelin singen·
tůnt die kalden winde we·
doch swie^{[WS 1]} kranc der svmer were·
wint ist so froͤiden lere·
dc er birt noch grosser swere·
mir wer liep das vns verbere·
rife vnd ǒch der kalde sne·
Frowe min·
ich wil din
diener sin·

Ach wc klage ich sender tvmmer·
sit noch grosser^{[WS 2]} ist min not·
ich lide al ze grossen kvmmer·
sit dú minne mir gebot·
dienen also reinem wibe·
wol ir minneklichen libe·
Ob si froͤide mir beschibe·
vnd die swere mir vertribe
mit ir liehten mv́ndel rot·
Frowe min·
ich wil din
diener sin·^{[WS 3]}

Wunneklichen ǒgen blike·
hant dc herze min gewunt·
die mich smahent also dike·
da von ist mir sorgen kvnt·
so si loslich von mir swenket·
vnd mich in den iamer senket·
vnd mich an den froͤiden krenket·
vnd min herze in rúwe ertrenket·
dc geschiht mir tvsent stunt·
Frowe min·
ich wil din
diener sin·^{[WS 4]}

Minne twinget âne schulde·
mich vil senden siechen man·
wan ich warb ie nach ir hulde·
dc ich růwe nie gewan·
minne liebes fuͤgerinne·
ach war tůst dv dine sinne·
dien ich dir nah vngewinne·
so bist dv gen mir vnminne·
sid ich dienen dir began·
Frowe min·
ich wil din
diener sin·^{[WS 5]}

Dú vil gůte vnd dú vil reine·
minneklich wol gezogen·
hat niht bresten wan ein kleine·
fúr die warheit vngelogen·
sist gen mir ein teil ze here·
in weis da niht wandels mere·
swar ich doch der lande kere·
so gib ich ir pris vnd ere·
si ist an tvgenden vnbetrogen·
Frowe min·
ich wil din
diener sin·^{[WS 6]}

Anmerkungen (Wikisource)

1. Vorlage: wie.
2. Vorlage: goſſer.
3. Vorlage: Frowe min ich· ⁊c̾·
4. Vorlage: Fro·
5. Vorlage: Frowe min·
6. Vorlage: Frowe min·