Wer gesach ie wnneklicher me den svͤssen meigen

Wer gesach ie wnneklicher me den svͤssen meigen·
wer gesach ie bas bekleit den walt vnd ouch die wnnenklichen heide·
wer gehort ie bas dv́ kleinen vogellin gesingen·
gegen der wnneklichen wnne in maniger svͤsser wnneklicher wise·
da gegen froͤit sich manig herze wan das mine alleine·
dc mv̊s iemer trurig sin es wende ir wiplich gv̊te·
dú mich senden mit gewalde lange her betwngen hat·

Owe trútelehter lip sol ich alsvs verderben·
owe spilnder ǒgen schin hei mvnt gevar nach wnneklichen rosen·
herzen trut ir wuͤstet an mir úwer vriges eigen·
wie zimt wibes gvͤte dc ob ich in senden sorgen svs verdirbe·
liebú frowe ich habe iv lange her gedienet von kinde·
des lat mich geniessen seht so wirde ich froͤideriche·
ob des niht geschiht so mv̊s min spilende froͤide ein ende han·

Ir vil wnnenklichen wip ir wolgemv̊ten leigen·
wúnschent dc mis herzen trut mich von den senelichen sorgen scheide·
so bitte ich die gv̊ten das si lâsse mir gelingen·
svͤsse minne ob das geschiht· dar vmbe ich dine werden tvgende prise·
minne dv weist wol es ist dú liebe die ich da meine·
hilf das mir dú here troͤste min gemv̊te·
ob des niht geschiht so wirt mir sender sorgen niemer rat·

Owe minne sol ich niht den roten kvs erwerben·
vnd den svͤssen vmbevank dar zů^{[WS 1]} ir minneklichen lip den losen·
suͤssv́ minne maht dv herzeliep an mir erzeigen·
nv was treit dich fúr ob ich nah der vil herzelieben in liebe stirbe·
minne ich mv̊s verderben ob ich niht die froͤide vinde·
ach dur got vil selig wib noch helfent helfecliche·
svͤssú minne frage si dur got was ich ir habe getan·

Anmerkungen (Wikisource)

1. Vorlage: ů.