Went ir in ganzen froͤiden sin

WEnt ir in ganzen froͤiden sin·
so wil ich ú tv̊n helfe schin·
vnd sit ir fro so froͤwe ich mich·
sit wir den svmer han gesehen·
Dú heide stat gar wunneklich·
des mv̊s man ir von schulden iehen·
dur kurzewile ich kan gegan·
vf eine gruͤne heide breit·
dc wc so wunneklich der plan·
dc mir swant min herzeleit·
da hort ich die vogel froͤwen·
sich der wunneklichen zit·
dc kan veron den svͤssen doͤwen·
dc si svngen widerstrit·
Ich hort da vil manigen don·
von den kleinen vogellin·
Dú heide gab in senften lon·
mit manigerhande blůmen schin·
der selben blůmen brach ich vil·
al da ichs vf der heide sach·
Es duhte mich ein senftes spil·
ein aventúre mir geschach·
Da von min herze in froͤiden was·
vnd iemer mv̊s in froͤiden sin·
Ich sach durh dc gruͤne gras·
gan ein vil schones megetin·
Min herze dc wart froͤidenrich·
do ich die schonen erest sach·
Si duhte mich so minnenklich·
dc ich mich ir fúr eigen iach·
vnd ich ir also nahe kan·
dc ich ir bot den minen grůs·
vnd si min rehte war genan·
do wart mir aller sorgen bůs·
Ahý wie dú vil liebe erschrac·
do min dú schone wart gewar·
Da wc so wunneklich der tag·
Si trůg ein schapel rosevar·
Schoner creatúre ich nie
gesach so rehte wol gestalt·
Da si vf der heide gie·
bi ir so wurde ich niemer alt·
Ich sprach der minneklichen zv̊·
wie sit sus eine komen ir·
Her an disem morgen frů·
si sprach ir svlt gelǒben mir·
Dur senften luft ich in dem tǒwe
her nah rosen blůmen gie·
Ich sprach minnekliche frowe
din genade sv̊che ich hie·
An si bewande ich min gemvͤte·
vnd darzů mis herzen sin·
Frowe dur din selber gvͤte·
nim min herze mit dir hin·
dc enpfa mit dinem lone·
du bist aller tvgenden vol·
Frowe mines herzen krone·
so dc geschiht so tůst dv wol·

Da wir sament in den kle·
traten vns wc sanfte we·
Die schonen drvhte ich her zemir·
si glei dc es vil lute erhal·
Ir roten mvnt den kvste ich ir·
si sprach ir bringent mich in schal·
Alsus wart ich ir redegeselle·
ich nam si bi der wissen hant·
von vns wart ein gůt gevelle·
mir wart herze liebe erkant·
Nieman kan gepruͤuen niht
was steter froͤide bi vns was·
Wan dem soliches heil geschiht·
der sol gelǒben deste bas·
der nie herzeleit gewan·
der ge mit froͤiden disen tanz·
ob im sin herze von minne enbran·
der sol von rosen einen kranz·
Tragen der git hoh gemvͤte·
ob sin herze froͤide gert·
vnd gedenke an frowen guͤte·
so wirt er vil wol gewert·
Si git froͤide michels me·
danne des vil lieben meien blůt·
al die blv̊men vnd kle·
ir svͤsser name der ist so gůt·
Dc hab ich vil wol befvnden·
an der lieben frowen min·
wol der minneklichen stunden·
dc ich sach ir ǒgen schin·
vnd ich in ir minnebanden
also sere gestriket wart·
Mit armen vnd mit wîssen handen·
wol der minnenklichen vart·
da ist si gerivelieret·
gruͤne heide
Mit cleinen velden wol gezieret·
an ir stat aller min gedank·
Dem tanze svln wir vrlob geben
wan er schiere ein ende hat·
vnd svln in hohem mv̊te leben·
megede ir hant es minen rat·
valsches truren werfent hin·
mit zúhten sult ir wesen fro·
Gewinnen wir der selben sin·
so svlen wir mit in tůn also·