Was froͤit mich der vogelin gvͤte (Mit aufgelösten Abbreviaturen)

Was froͤit mich der vogelin gvͤte·
vnd des wnnenklichen meigen schin·
sol min froͤiderich gemvͤte·
vnd min spilndes herze erwendet sin·
dc tet mir ein wib mit gvͤte·
das got noch ir eren hvͤte·
swie si mir nv treit vil senden pin·

Swa mitte ich verdienen kvnde·
der vil schonen hvlde dc tete ich·
sit dc mines herzen wnde·
vnuerheilet stent si heile mich·
da von mich ein wort enbvnde·
ob si spreche vs rotem mvnde·
trutgeselle es ist zit lones wider dich·

Mir mag sorge vs herzen dringen·
roter mvnt din minnenklicher grůs·
lat din lachen mir gelingen·
an ir minne so ist mir swere bv̊s·
ir vil minnekliches twingen·
an die brvst dc mag mich bringen·
an die stat da minne mich froͤwen mv̊s·

Wer kan truren bas verswenden·
danne ein reine minnekliches wib·
trost von wiben der kan wenden·
sende sorge ir kúscher wibes lip·
der mag mir wol helfe senden·
so nige ich den lieben henden·
wib min froͤide von der sorge trip·

Kan mich ieman fro gemachen·
ia der lieben mvnt dvrlúhtig rot·
so mv̊s al min truren swachen·
scheidet mich ir trost von sender not·
man siht mich vil froͤlich lachen·
dc min herze mv̊s erkrachen·
machet mich dú liebe in froͤiden rot·