Wan hoͤrt aber klingen

Wan hoͤrt aber klingen·
dvrch den walt·
svͤsses vogel singen·
wol [im] der nu lebt·
vnd da bi verdrungen·
manigualt·
sorge mag des ringen·
gar in selden swebt·
lichte svmer wunne· dv́ nv winters wêwen·
mit ir gruͤnen klêwen·
frilich wider strebt·
Minne troͤsterinne·
sinne wie ich sender brinne·
von der dirne din·
sunder schulde min·

Minne bring ir iugent·
selken rat·
das si noch tů húgent·
min gemuͤte krank·
es zimt nicht ir tugent
das si hat·
mich getan vnmugent·
der ich ich ie sang·
sit ich erst gesach ir mundes roͤte glesten
sam die blůt vs esten·
gar an allen wank·
Minne troͤsterinne·
sinne wie ich sender brinne·
von der dirne din·
sunder schulde min·^{[WS 1]}

Ich want sin gescheiden·
do ze stunt·
von dien arbeiden·
die min herze trůg·
do viel ich ze leiden·
vngesvnt·
von den ǒgen weiden
wart ich vngefůg·
das ich sunder allen zwiuel můs verderben
ob ich niht erwerben
mag ir hulde klůg·
Minne troͤsterinne·
sinne wie ich sender brinne·
von der dirne din·
sunder schulde min·^{[WS 2]}

Anmerkungen (Wikisource)

1. Vorlage: Minne troͤſterinne· ⁊c̾·
2. Vorlage: Minne troͤ·